Ижтимоий тармоқларда Андижонда ички ишлар органлари ходими томонидан шифокор калтакланганлиги ҳақида хабар берган эдик.
Бош прокуратура Матбуот хизмати ушбу воқеа назоратга олинганини маълум қилди.
ИИВ Матбуот хизмати аслида шифохонада қандай ҳолат юз берганини изоҳлаб берди.
Андижон вилояти ИИБ Ахборот хизматининг берган маълумотига кўра, 2020 йил 29 август куни соат 13:30ларда туман ИИБ профилактика инспекторига Андижон тумани тиббиёт бирлашмасига қарашли 3-сонли қишлоқ оилавий поликлиникада жанжал бўлганлиги ҳақида хабар келиб тушган.
Ҳолат ўрганилганда, аниқланишича, мазкур поликлиника умумий амалиёт шифокори фуқаро О.Ю., шу куни иш фаолиятини олиб бораётган вақтида, Андижон тумани Кенгаш МФЙда истиқомат қилувчи фуқаро М.Ғ. жияни М.А.нинг соғлиғи ёмонлашганлиги учун уни тиббий кўрикка олиб келган,сўнгра ҳақиқатдан навбат талашиб, фуқаро ва шифокор ўртасида ўзаро келишмовчилик ва жанжал келиб чиққан. Шифокорнинг тушунтиришига кўра мазкур ҳолат юзасидан унда ҳеч кимга нисбатан даъвоси йўқ, келишмовчилик оқибатида тан жарохати олмаган.
Ўз навбатида, иккинчи томон М.Ғ. ҳам икки томонлама жанжал ўзаро тушунмовчилик натижасида келиб чиққанлигини, шифокордан кечирим сўраб, тартибсизлик қилганидан пушаймон эканлигини, хозирда шифокорга нисбатан эътирози йўқлигини, тан жарохати олмаганлигини баён қилган.
Томонлар ва гувоҳларнинг кўрсатмалари ҳамда иш бўйича тўпланган материаллар ҳуқуқий баҳоланиб, ички ишлар органлари томонидан жиноят иши қўзғатишни рад этиш ҳақида қарор қабул қилинган.
Ички ишлар органлари ходимлари мазкур келишмовчиликда иштирок этишмаган.
Юқоридагилардан келиб чиқиб, ахборот тарқатувчи телевизион каналлар ва айрим ижтимоий тармоқлардан, жамоатчиликка эълон қилинаётган маълумотларни текшириб, холислигига ишонч хосил қилганидан сўнг аҳолига етказишларини сўраб қоламиз.
Текширилмаган ва ёлғон ахборотни, шунингдек ички ишлар органлари ходимларини обрўсизлантиришга қаратилган маълумотларни тарқатиш қонунда белгиланган тартибда жавобгарликни келтириб чиқаришини унутмасликларини сўраб қоламиз, дейлади Матбуот хизмати хабарида.
