Аввал хабар берганимиздек, 2020 йил 17 декабрдан бошлаб "Tashkent city"га кириш пуллик бўлди. Айни пайтда ижтимоий тармоқларда ушбу янгилик кенг муҳокама қилинмоқда, қатор фаоллар томонидан ҳолат танқид остига олинмоқда. Хусусан, иқтисодчи Абдуқаҳҳор Иминохунов ҳам бу ҳақда ёзди.
"Тошкент шаҳрининг марказидаги бир қанча маҳаллалар бузиб ташланди. Одамларни уйлари, хусусий кафелар, тўйхона, дўкон, офис кабилар қаторида "Дом Кино" га ўхшаган бир қанча давлатга тегишли бинолар ҳам бузиб ташланди.
Хусусий сектор компенсация олганлиги ҳақиқат. Кимлардир шаҳар марказидан кўчиб кетганлиги учун ютқазди, кимлардир хароб уйини ўрнига кўп қаватли янги уйдан квартирага эга бўлгани учун ютди. Лекин давлатга тегишли бинолар бузиб ташлангани учун давлатга компенсация тўланмади.
Тошкент-Ситини қуриш билан банд бўлган корхоналарга жуда катта солиқ ва божхона имтиёзлари берилди. Импорт қилинган қурилиш материаллари, техника ва технологиялар божхона божларидан озод қилинди. Бу имтиёзлар натижасида давлат бюджети бир неча юз миллиард сўмни, эҳтимол, триллионлаб маблағларни йўқотгани ҳақиқат.
Шунча имтиёз олган хусусий корхоналар қурган уйларини бозор нархидан арзонроқ сотмадилар, аксинча, уйлар ўртачадан қимматроқ нархларда сотилди.
Натижа нима бўлди? Тошкент-Сити қурилишидан бюджет қандай наф кўрди? Давлат нимани ютди? Халқ нимага эришди?
Шу имтиёзлар берилмаганда, ер умумбелгиланган тартибда аукционда сотилганда, пойтахтнинг энг марказидаги юзлаб гектар жойни сотишдан бюджетга қанча пул тушган бўлар эди?
Тошкент-Ситини қурган қурилиш компаниялари ҳамма қатори солиқ ва божхона божларини тўлаганларида, уларга бошқаларга берилмаган индивидуал солиқ ва божхона имтиёзлари берилмаганда, давлат бюджетига яна қанча триллион қўшимча маблағ тушган бўлар эди?
Шунча маблағ йўқотган халқ бу йўқотишлар эвазига нимага эга бўлди? Нимага эришди?
Биз шу саволларни бермай келаётган эдик. Арзимаган 10 минг сўмлик ноҳақ тўлов шу саволларни кун тартибига қўйилишига сабаб бўлди.
Шаҳар кўчаларидан ўтиш учун тўлов ундиришга қонун ҳужатларида рухсат берилганми?
Қонун ҳужжатларида Тошкент-Сити деган парк борми ўзи? Белгиланган тартибда солиқ тўловчи сифатида давлат рўйхатидан ўтказилганми?
Аҳолидан тўлов ундириш учун қандай ҳужжат асос бўлди? У ҳужжатни ким имзолаган? Шунга ваколати борми?
Тошкент-Ситини ҳуқуқий мақоми қандай ўзи? Тўлиқ хусусийми ёки давлат улуши ҳам борми?
Тушум кассага тўлиқ кирим қилиняптими?
ДСҚ буни назоратга олганми?
Шаҳарни маълум бир жойидан, умумий фойдаланишдаги йўлдан, қурилиши битмаган ҳудуддан ўтганлик учун ҳақ ундиришга қонунда рухсат берилганми?
Биронта саводли юрист масаланинг ҳуқуқий жиҳатларини тушунтириб бера оладими?
Халқ депутатлари Тошкент шаҳар Кенгаши депутатлари, Монополияга қарши курашиш қўмитаси, Коррупцияга қарши курашиш агентлиги, Давлат солиқ қўмитаси, Тошкент шаҳар ҳокимлигидан муносабат билдиришларини сўраймиз.
P.S. Ҳоким "Халқим" деб мурожаат қилганда сал ноқулай эшитилган эди, политкорректность деган тушунчалар бор, биз фақат президент "Халқим" деб мурожаат қилишига ўрганиб қолган эканмиз. Кейин, Ҳоким "Булар ҳаммаси миллатимиз учун" деб бир неча маротаба такрорлаган экан. Қайси миллат назарда тутилган экан, тушунмай қолдим. Конституция бўйича бизда ҳамма миллатлар тенг-ку.
Бизни халқимизга, бизни миллатимизга бу жойларга ҳаттоки кириб кўриш ҳам пуллик қилиб қўйилди.
Ҳоким бизга номаълум, фақат ўзига маълум бўлган қайсидир бир халқи, қайсидир бир миллати учун қурганмикин бу биноларни? Тушунарсиз.... ", деб ёзиб қолдирган иқтисодчи.
