Пойтахтимизда “Ўзбекистон ҳаво йўллари” миллий авиакомпаниясининг 24 йиллиги муносабати билан “Boeing” корпорацияси ҳамкорлигида ташкил этилган Самолётларнинг композит материалларини таъмирлаш маркази очилди.
Шу муносабат билан ўтказилган тадбирда “Ўзбекистон ҳаво йўллари” миллий авиакомпанияси хизматлари, “Uzbekistan Airways Technics” авиакорхонаси, “Boeing” корпорацияси вакиллари ва оммавий ахборот воситалари ходимлари иштирок этди.
“Ўзбекистон ҳаво йўллари” миллий авиакомпаниясининг 24 йиллигига “Uzbekistan Airways Technics” авиакорхонасида Самолётларнинг композит материалларини таъмирлаш маркази ишга туширилди. Миллий авиакомпаниямиз ва хорижий компаниялар самолётларига барча турдаги техник хизматлар кўрсатиш учун замонавий техник база ва малакали ходимларга эга ушбу корхона томонидан тақдим этилаётган барча хизматлар халқаро сертификатлар билан тасдиқланган.
Шуни таъкидлаш керакки, авиакорхона мутахассислари Airbus A320 ва Boeing-757/767 самолётлари планерининг композитдан тайёрланган эҳтиёт қисмларига хизмат кўрсатиш тажрибасига эга. Ушбу марказнинг ишга туширилиши Ҳаво кучлари кемаларига техник хизмат кўрсатиш бўйича миллий провайдерни янада ривожлантиришда янги босқични бошлаб беради. Миллий авиакомпаниямиз ва «Boeing» корпорациясининг ушбу қўшма лойиҳаси тараққиёт ва замонавий технологияларни ўзлаштиришга интилаётган Ўзбекистон фуқаро авиацияси замон билан ҳамнафас бораётганини яна бир бор тасдиқлайди.
«Boeing» корпорацияси ушбу марказни ташкил этишга ярим миллион доллар миқдорида беғараз сармоя киритди. Корхонага ушбу маблағлар ҳисобидан титан қотишмаларига ишлов бериш ва самолёт тумшуғини таъмирлаш учун инерт муҳитли печлар, барча турдаги ҳаво кемаларининг композит эҳтиёт қисмларини таъмирлаш имконини берадиган ускуналар етказиб берилди.
Марказнинг самарали фаолият юритишини таъминлаш мақсадида малакали кадрлар жалб этилди. Улар «Boeing» русумидаги самолётларнинг композит эҳтиёт қисмларини таъмирлаш бўйича таълим олган, механиклар Сингапурда Basic Composites Repair and Metal Bond курси бўйича назарий ва амалий тайёргарликдан, муҳандислар эса Сиэтлда назарий тайёргарликдан ўтган. Шунингдек, жорий йилда «Uzbekistan Airways Technics» мутахассисларини Boeing-787 Dreamliner лайнерларининг композитдан тайёрланган эҳтиёт қисмларини таъмирлаш бўйича ўқитиш режалаштирилган.
