Flydubai авиакомпаниясининг Ростовда ҳалокатга учраган самолёти собиқ учувчиси ўзининг RT телеканалига берган интервьюсида учувчилар ҳаддан ортиқ чарчаган ҳолатда ишлаганларини айтиб берди.
Унинг маълум қилишича, у ҳалоктга учраган 981-машъум рейсда парвоз қилган иккинчи учувчининг иш жадвалини қўлга киритган. Ундан кўриниб турибдики, иккинчи учувчи 15 мартдан ташқари кетма-кет 11 кун ишлаган.
Унинг сўзларига кўра, Flydubai учувчилари бир неча бор раҳбариятга ҳаддан ортиқ чарчоқдан шикоят қилишган. 2015 йилнинг сентябрь ойида учувчиларнинг чарчагани ҳақида 20 дан ортиқ шикоят келиб тушган. Учувчилар уларнинг иш жадвалида дам олиш куни жуда камлиги, рейслар орасидаги танаффус тўйиб ухлаб олишга ҳам етмаслигини айтишган.
Flydubai ходимлари орасида сўровнома ўтказилди. Унда иштирок этган 80% ортиқ учувчилар FlyDubai самолётларида авиаҳалокат бўлиш эҳтимоли юқорилигини айтишган.
RT телеканали сухбатдоши шунингдек, айрим учувчилар самолёт бошқаруви вақтида учувчиларнинг ухлаб қолганлиги ҳолатлари ҳам учраганини маълум қилди. Учувчилар бу ҳақда компания раҳбариятига маълум қилишган, бироқ раҳбарият томонидан ҳеч қандай чора кўрилмаган. Ҳатто авиакомпания учувчиларидан бири парвоз вақтида 8 дақиқа ухлаб қолганини маълум қилган.
Flydubai компаниясининг Boeing 737-800 йўловчи самолёти Ростов -Донда 19 март куни соат 03.42 ҳалокатга учради. Лайнер бортида 55 нафар йўловчи ҳамда етти нафар экипаж аъзоси бўлган, уларнинг барчалари ҳалок бўлган. РФ тергов қўмитаси ҳалокатнинг учта асосий сабабини кўриб чиқмоқда: техник носозлик, оғир об-ҳаво шароити, экипаж хатоси.
