Брюссель шаҳрида юз берган терактларнинг янги тафсилотлари пайдо бўлмоқда. АҚШ ҳукумати Брюссель аэропорти ва метросида ўзларини портлатиб юборган ака-ука Бакрауларни анча олдин террорчилар рўйхатига киритган эди.
“Манбаларнинг тасдиқлашича, ака-ука террорчилар Холид ва Иброҳим Бакраулар АҚШ ҳукумати томонидан тузилган террорчиликда гумонланаётган шахслар рўйхатига Брюссель терактлари содир бўлгунга қадар киритилган эди”,—дейилади хабарда.
Мазкур хабар ҳали расман тасдиқланмаган. Бундан ташқари, ҳудкуш террорчилардан бири Иброҳим Бакрауни Туркия ҳукумати икки маротаба “Суриядаги жангари ҳаракатларда иштирок этганликда” айблаб, мамлакат ҳудудидан чиқариб юборган эди.
Сўнгги маротаба уни Нидерландияга юборишган эди. 2010 йилда Иброҳим Бакрау Бельгияда ҳибсга олишга қаршилик кўрсатгани ва қурол иштирокида безорилик содир этгани учун ҳибсга олиниб, тўққиз йил муддатга озодликдан маҳрум қилинган эди.
У 2014 йилда муддатдан олдин озодликка чиқарилган ва Суриядаги жангари ҳаракатларда иштирок этиш учун жўнаб кетган эди.
Маълумот учун, 22 март куни Бельгия пойтахти Брюссель шаҳри аэропорти ва метросида бир нечта терактлар содир бўлди.
