Мамлакатимизда автомобиль транспортида йўловчиларга хизмат кўрсатиш фаолиятини тартибга солиш ҳамда ривожлантиришнинг ҳуқуқий асослари яратилиб, уларнинг ижроси мунтазам таъминланиб келинмоқда.
Бу борада Вазирлар Маҳкамасининг Йўналишсиз таксилар фаолиятини тартибга солиш чора-тадбирлари тўғрисидаги қарорини алоҳида таъкидлаш жоиз. Зеро, ушбу қарор йўналишсиз таксилар томонидан йўловчиларга кўрсатиладиган хизмат сифати ва хавфсизлигини таъминлашда муҳим аҳамиятга эгадир.
Мазкур ҳужжатда йўналишсиз такси сифатида фойдаланиладиган ҳар бир автотранспорт воситаси техник жиҳатдан соз ҳолатда, автомобиль транспортида йўловчилар ҳамда юк ташиш қоидаларида белгиланган талабларга мувофиқ бўлиши қайд этилиб қолмасдан, уларнинг ташқи ва ички белгилари нималардан иборат бўлиши аниқ кўрсатилган. Бу ҳақда Давлат солиқ қўмитаси Ахборот хизмати бошлиғи Музаффар Юсуф НАЗАРОВ ёзади.
Яъни, йўналишсиз таксиларнинг тепасига «TAXI» ёзуви битилган тўқ сариқ рангли фонар ўрнатилиши, машинанинг олдинги эшикларига «Т» ҳарфи, шахмат тартибида жойлаштирилган қора квадратлардан иборат бўлган композиция ва ушбу транспорт воситаси қарайдиган корхона (юридик шахс)нинг номи битилиши шарт.
Тошкент шаҳридаги йўналишсиз таксилар «фил суяги» ранги билан, бошқа барча вилоятлардагилар эса сариқ рангга бўялади.
Машинанинг ичкариси қуйидаги тартибда жиҳозланиши лозим. Олд ойнанинг юқоридаги ўнг бурчагига яшил рангли ёритиш чироғи ўрнатилиб, автомашинанинг давлат рақами белгиси, ҳайдовчининг фамилияси, исми, отасининг исми ва фотосурати, иш вақтининг бошланиши ва тугаши, йўлкира қиймати (сўмда), такси корхонасининг манзили ва телефон рақами, лицензия карточкасининг рақами ва амал қилиш муддати тўғрисидаги, шунингдек, мажбурий суғурта қилинганлик ҳақидаги маълумотлар йўловчилар бемалол ўқий оладиган ҳолатда ўрнатилган бўлиши лозим.
Бундан ташқари, ҳисоблагич (таксометр), радиоалоқа воситаси, соз ҳолатда тамғаланган спидометр жиҳозлари, Давлат солиқ хизмати органларида рўйхатдан ўтказилган назорат-касса машинаси ҳамда тўловларни банк пластик карточкаларидан қабул қилиб олиш учун ҳисоб-китоб терминали мавжуд бўлиши талаб этилади.
Жорий этилган бундай талаблар, транспорт хизматлари сифатини ошириш ҳамда йўловчиларга ўзи буюртма қилган йўналишсиз такси ва унинг ҳайдовчиси ҳақида етарлича маълумотга эга бўлиш имконини беради.
Бугунги кунда йўналишсиз таксилар фаолиятини тартибга солиш, автотранспорт воситаларида аҳолига ноқонуний равишда пулли хизмат кўрсатишга барҳам бериш мақсадида, Давлат солиқ хизмати органлари томонидан манфаатдор идора ва ташкилотлар билан ҳамкорликда назорат тадбирлари ўтказилмоқда.
Хусусан, жорий йилнинг ўтган даври мобайнида 3500 дан ортиқ тадбирлар ташкил этилиб, 7500 нафар жисмоний шахс ноқонуний фаолият билан шуғулланаётганлиги аниқланган ҳамда уларга нисбатан тегишли маъмурий чоралар кўрилди.
Шу ўринда яна бир масалага эътиборингизни қаратмоқчиман. Мамлакатимизда амалдаги тартиб-қоидаларга амал қилмасдан, ноқонуний равишда «киракаш»лик фаолияти билан шуғулланаётган жисмоний шахсларга нисбатан «Маъмурий жавобгарлик тўғрисида»ги Кодекснинг 1763-моддасига мувофиқ, энг кам ойлик иш ҳақининг 20 бараваридан 100 бараваригача миқдорида маъмурий жарима қўлланилиши белгилаб қўйилган.
