Ўзбекистонда зўравонликка қарши "Сукут сақлама" лойиҳаси 63 ёшли аёл невараси тенги йигит томонидан зўравонликка учрагани ҳақида мақолани эълон қилган эди. Ушбу воқеа Тошкент шаҳрида юз берган.
Унда айтилишича, Марина Ивановна 2021 йил 11 сентябрь куни бир йигит томонидан зўровонликка учраган. 18 сентябрь куни жабрланувчи аёл ҳуқуқ-тартибот органларига мурожаат қилиб, содир бўлган воқеани батафсил баён қилган. Аёлга 4 кун давомида турли эркакларнинг суратлари кўрсатилган. 23 сентябрь куни жабрланувчи ИИББга чақирилиб, яна бир неча кишиларнинг суратлари кўрсатилган. Улар орасида ўша кунги йигитнинг ҳам сурати бўлган. У воқеа қайд этилган кузатув камералари орқали топилган. Аёл унга ҳужум қилган йигит анча ёшлигига гувоҳ бўлган. У аёлдан ундан, тахминан, уч баравар кичик бўлиб, том маънода невараси тенги эди.
Сурат орқали шахси аниқлангандан кейингина тезкор ходимлар жабрланувчига тиббий текширувдан ўтиши кераклигини айтган. «Наҳотки тажрибали тезкор ходим бундай текширув имкон қадар тезроқ ўтказилиши кераклигини билмайди?», деб савол берилган «Сукут сақлама» лойиҳасида. Ариза ёзилганидан 6 кун, воқеа содир бўлганидан эса қарийб 2 ҳафта вақт ўтган.
Тиббий кўрикдан сўнг ишни терговчига топшириш арафасида тезкор ходимлар жабрланувчи ҳали суд-тиббий экспертизасидан ўтмаганини эслайди ва уни суд-тиббий экспертиза марказига юборади. Шифокор аёлни кўздан кечириб, унинг ҳолатини енгил тан жароҳати, деб баҳолайди.
Аёл суд-тиббий экспертизадан қайтгач, уйига гумонланувчи йигитнинг бувилари бўлган икки аёл келади ва йиғлаб, невараси маст бўлганини айтиб, уни кечиришни сўраб, ёрдам таклиф қилади. Марина Ивановна буни рад этиб, эшикни ёпади. Бир неча кундан сўнг уйига гумонланувчининг опаси бир эркак билан келади. Аёл уларга эшикни очмай, кетишларини сўрайди.
Аёл тергов кейин қандай давом этганини билмайди — унинг чўзилиб кетганини сайловолди жараёни билан изоҳлашади. 21 октябрь куни Марина Ивановна гумонланувчи билан юзма-юз учрашишга чақирилади.
Йигит ва унинг адвокати воқеани умуман бошқача изоҳлайди: «Аёл йигитни ҳақорат қилган, кейин эса сабабсиз урган. Йигит маст бўлгани учун ҳеч нарсани эслай олмайди, бироқ дастлаб жабрланувчини севган қизи билан адаштириб юборгани эсида». Адвокатнинг сўзларига кўра, Марина Ивановна ўзига ўзи зарар етказган бўлиши мумкин. У, шунингдек, аёлни воқеа жойида гувоҳларни кутмаганликда, 102 ёки 103 га қўнғироқ қилмаганликда айблаган.
Ташкент шаҳар ИИББ расмий баёнотида қайд этилишича, пенсионер аёлга нисбатан ёш йигит тегажоқлик қилганлиги юзасидан Чилонзор тумани ИИО ФМБ Тергов бўлими томонидан гумонланувчи 2001 йилда туғилган A.Z.ga нисбатан Ўзбекистон Республикаси ЖКнинг 277-моддаси (“Безорилик”) аломатлари билан жиноят иши қўзғатилиб, тергов ҳаракатлари олиб борилмоқда.
Тергов якуни бўйича қонуний қарор қабул қилинади, - дейилади баёнотда
