Ўз кучи билан ҳаётда ўрнини топган 10 машҳур инсон

Шон-шуҳратга эришиш ҳеч қачон осон бўлмаган. Унга эришиш учун қанча қийинчиликлар-у, синовларни бошдан ўтказишга тўғри келади. Кўп машҳур инсонлар айнан шу прицип асосида ҳаракат қилиб, барча қийинчиликларни енгишган ва юқори чўққиларни забт этишган.   

AdMe.ru нашри сиз учун қобилияти ва тинимсиз меҳнатлари эвази машҳур бўлган инсонлар ҳақида ҳикоя қилади. 

Жоан Роулинг

Машҳур ёзувчи ва сеҳрли болакай ҳақидаги китоблар муаллифининг болалиги жуда оғир кечган. У отаси билан алоқа қилмаган, онаси эса оғир касал бўлган. Университетни битирган Жоан ҳаётда ўрнини топиш учун бир неча жойларда ишлашга мажбур бўлган. 1990 йилда Манчестер — Лондон поездида кетаётганда унинг хаёлига ёш сеҳргарлар мактаби ҳақида асар ёзиш ғояси келади. Аммо ҳаёт унга навбатдаги синовни тайёрлаб қўйгани учун китобни орадан 5 йил ўтгач, якунлайди. Роман 1997 йилда кам ададда чоп этилган бўлса-да, йилнинг энг яхши болалар китоби деб тан олинган.

Кристина Асмус

Кристина Асмус болалигидан гимнастика билан шуғулланган бўлса-да, қайсидир лаҳзада ҳаётини театр ва киносиз тасаввур қилолмаслигини  англади. Ота-онаси уни қўллаб-қувватлагани боис бир уринишда Москва бадиий академик театрининг мактаб-студиясига ўқишга қабул қилинди, аммо олти ойдан кейин ўқишдан четлатилди. Барча қийинчиликларга қарамай, тиришқоқлиги, ўз устида тинимсиз ишлаши натижасида унга омад кулиб боқди. Кристинага сериалларнинг биридан бош қаҳрамон ролини беришди, бу роль унга машҳурлик сари йўл очиб берди

Жим Керри

Жим Керрининг оиласи пулга муҳтож бўлгани сабабли, у мактабда ўқиб юрган пайтларидаёқ ота-онасига ёрдам бериш мақсадида ишлай бошлаган. Жим илк бора маҳаллий камеди клаб саҳнасига чиққанда, унинг дебюти муваффақият қозона олмади.

Орадан 2 йил ўтиб, у яна саҳнага чиқишга қарор қилди ва муваффақиятга эришди. Шундан кейин Жим экранда пайдо бўлиш истагида Лос-Анжелесга кўчиб ўтди. Орадан кўп ўтмай, уни кам бюджетли “Эйс вентура” фильмидаги бош ролга тасдиқлашди. Кўпгина машҳурлар роль ўйнашни бош тортган бу фильм Жим Керрини оламга танитди ва машҳур инсонга айлантирди.

Деми Мур

Машҳур актриса Деми Мур шу кунларга етиб келгунча, қанча машаққатларни бошдан кечирди. Ўсмир пайтида моделлик агентлигида ишлаш учун мактабни ташлаган. Орадан кўп ўтмай, ҳаётини кино билан боғлаш мақсадида бир қанча ёшлар учун суратга олинган фильмларда иккинчи даражали ролларни ўйнаган. Аммо бундан тушкунликка тушмади, “Руҳ” кинофильмидаги роли уни дунёга машҳур қилди.

Женнифер Лопес

Муваффақият сари элтувчи манзилга етиб бориш Жей Лога ҳам осон бўлмаган. Унинг ота-онаси камтарона ҳаёт кечирса-да, болаларига яхши таълим-тарбия беришга интилишган. У болалигиданоқ рақс ва хонандалик билан шуғулланган. Бу албатта келажакда ўз мевасини берди. Ўрта маълумотга эга бўлган қиз юридик фирмага ишга кирди, аммо кўп ўтмай, ишини ташлаб, машҳур рақс мактабида рақс билан жиддий шуғуллана бошлади. Унинг бу ишини ота-онаси қўллаб-қувватламайди, оқибатда Жей уйдан чиқиб кетади. У машҳур хонандаларнинг концертларида рақсга тушади, бир неча фильмларда роль ўйнайди. Жейнинг истеъдоди назардан четда қолмади ва у машҳур инсонга айланди. 

Том Круз

Том Круз бойликдан, таниш-билишдан йироқ оддийгина оилада дунёга келди. Ҳали мактабда ўқиб юрган пайтларидаёқ онасига ёрдам бериш мақсадида ишлай бошлаган. 18 ёшга тўлганда актёр бўлиш орзусини амалга ошириш учун Том Нью-Йоркка йўл олади. Чўнтаги бўм-бўш бўлса-да, турли кастингларда иштирок эта бошлади. Аммо бўйининг пастлиги туфайли доимо ютқазиб қўяди. Орадан бир неча йил ўтиб “Хавфли бизнес” фильмидаги ролидан кейингина унинг омади келди.

Селин Дион

Селин Дион болалигиданоқ мусиқага қизиққан. Ҳатто унинг исми “Селин” деб аталган қўшиқ шарафига қўйилган. У турли оилавий тадбирларда қўшиқ айтган, 12 ёшида биринчи қўшиғини ёзган. Бир куни акаси Мишель опаси Селиннинг қўшиғини мусиқа менежерига юборади. Қизнинг овозидан ҳайратга тушган мусиқачи уни юлдузга айлантираган. Шундай қилиб, Селиннинг хонандалик фаолияти бошланиб кетган.

Дэниел Крэйг

Британиялик машҳур актёр Дэниел Крэйг Голливуднинг энг машҳур актёрлари қаторига кирган бўлса-да, унинг шу даражага еткунча, бошидан нималарни кечирганини ҳамма ҳам билавермайди. У болалигиданоқ ҳаётини санъат билан боғлаган, 6 ёшлигидан бошлаб, театр саҳнасида роль ўйнаган. Театр мактаби дипломини қўлга киритган Дэниел киноларда роль ўйнаса ҳам, муваффақиятга эришмади. Аммо у бундан кайфиятини туширмади. Бир неча йил давомида  “Лара Крофт: даҳма таловчи” фильмида бадкирдор ролини ўйнади ва шундан кейин шон-шуҳратга эришди.

Женнифер Энистон

Омадли актриса номига эришгунча Женнифер Энистон курьер, официантка бўлиб ишлаган, ҳамда бир қанча бродвей постановкаларида қатнашган. У илк телевизион ролини 1990 йилда қўлга киритди. Кейин даҳшатли фильмда суратга тушди, аммо унинг бу роли танқидга учради, матбуот уни жуда қоралади. Бундан ҳафсаласи пир бўлган Женнифер актрисаликни ташламоқчи бўлди, аммо худди шу пайтда у “Дўстлар” сериалидаги бош қаҳрамонлардан бири ролига тасдиқланади. Шундан кейин у муваффақият чўққисига чиқади. 

Опра Уинфри

Опра жудаям камбағал оилада дунёга келади, унинг ҳатто ўйинчоқлари ҳам бўлмаган. Шунга қарамай, у ҳаётдан нима исташини яхши англаган. 17 ёшида нотиқлик бўйича ўтказилган танловда биринчиликни қўлга киритиб, университетга грант асосида ўқишга қабул қилинади. Ўқишни битиргач, янгиликлар дастурини олиб бориш учун телевидениега таклиф қилинади. 29 ёшлигида рейтинги паст тонгги кўрсатувлардан бирининг бошловчиси вазифасига таклиф қилинади. Опра бу кўрсатувга жон бағишлайди. Орадан бир ой ўтар-ўтмас бу кўрсатув энг машҳур ток-шоулардан бирига айланади. Натижада кўрсатув номи ўзгариб, “Опра Уинфри шоу” сига айланади.