ЖССТнинг берган маълумотларига кўра, энг кўп касалланиш кўрсаткичлари Буюк Британия ҳиссасига тўғри келмоқда — 207 нафар. Иккинчи ўринда 156 нафар бемор билан Испания, учинчи ўринда эса 138 та ҳолат билан Португалия боряпти.
Шимолий Америка, Австралия ҳамда Европанинг бошқа мамлакатларида ҳам ўсиш динамикаси кузатилмоқда.
Ваҳоланки, ЖССТнинг 26 май куни эълон қилинган ҳисоботида ушбу инфекция билан хасталанганлар сони 257 нафардан иборат эди. Бир ҳафта ичида мавжуд кўрсаткичлар 203 фоизга ошгани мутахассисларда хавотир уйғотяпти.
Маълумки, Ғарбий Африка давлатлари маймун чечагининг табиий ўчоғи ҳисобланади. Бироқ касаллик аниқланаётган беморларнинг аксарияти ушбу қитъада саёҳатда бўлмаган.
Яъни инфекция эндемик бўлмаган давлатларда авж олмоқда. Бу ҳолат хасталик биз ўйлагандан аввалроқ ушбу мамлакатларга кириб келган, деган тахминларга сабаб бўлмоқда.
Шунга қарамай, янги рўйхатга олинган беморлар орасида ҳозирча ўлим ҳолатлари кузатилгани йўқ. Шу боис ЖССТ ҳали маймун чечаги глобал пандемия учун асос бўлмайди, деган хулосада.
