Канада ҳукумати Россиянинг нефть, газ, кимё саноати ҳамда иқтисодиётнинг бошқа тармоқларига нисбатан янги чекловчи чораларни жорий қилди. Бу ҳақда мамлакат ташқи ишлар вазирлиги сайтида чоп этилган тегишли ҳужжатда айтилган.
Хусусан, Канада компаниялари ва фуқароларига Россиянинг нефть, газ, кимё ва тоғ-кон саноати вакиллари билан бизнес юритиш, жумладан, кўмир ва металл рудаларини қазиб олиш тақиқлангани қайд этилган.
Бундан ташқари, Оттава Россия Федерациясининг нефть-газ ва кимё саноати билан боғлиқ чеклов остида қолган 28 та фаолият рўйхатини эълон қилди. Улар қурилиш ва транспорт турлари, компьютер, бухгалтерия ҳисоби, консалтинг, муҳандислик ва бошқа хизматларга тегишли.
Оттава февраль ойи охиридан бери Украинадаги вазият туфайли Россия Федерациясига нисбатан иқтисодий санкциялар жорий қилмоқда. Канада охирги марта 31 май куни иқтисодий чекловларни жорий қилган. Кейинроқ рўйхатга Россия Федерациясидан тўртта компания ва 22 нафар жисмоний шахс киритилди.
