Бугун, 15 июнь куни Ахсикент меҳмонхонасида “Jazeera airways” авиакомпаниясининг иш бошқарувчиси (Country Manager – Uzbekistan) Илдар Абубакиров билан учрашув бўлиб ўтди.
Унда Наманган вилояти Туризм ва маданий мерос бошқармасининг ва вилоят нодавлат нотижорат туристик агентликлар вакиллари иштирок этишган.
Учрашувни ўтказишдан кўзланган асосий мақсад “Jazeera airways” авиакомпанияси томонидан Наманган – Қувайт – Наманган йўналишида доимий рейсларни йўлга қўйиш орқали водий аҳолисига янада қулайлик яратишдан иборат эди, дея хабар бермоқда Наманган халқаро аэропорти матбуот хизмати.
Таъкидланишича, тадбирда йиғилганларга “Jazeera airways” авиакомпаниясининг иш фаолияти ва хизмат турлари тўғрисида маълумот берилган.
Шунингдек, Фарғона водийсида расмий ваколатхона очиш ва август ойидан бошлаб Наманган – Қувайт – Наманган йўналишида доимий рейсларни йўлга қўйиш режалаштирилаётгани маълум қилинган.
