Бу борада Санитария-эпидемиологик осойишталик ва жамоат саломатлиги хизмати Вакциналар ва иммунопрофилактика бўлими бошлиғи Д.Турсунова қуйидаги фикрларни билдирди:
- Жаҳон соғлиқни сақлаш ташкилотининг маълумотларига кўра, ҳар йили дунё бўйича 528 000 нафар аёл бачадон бўйи саратони касаллиги билан касалланaди. Ачинарлиси, 266 000 нафари мазкур касаллик оқибатида вафот этади.
Ўзбекистонда эса ҳар йили 1660 нафар аёл бачадон бўйни саратони касаллигига чалинаётган бўлса, 608 нафар аёл вафот этмоқда. Бу касаллик профилактикаси ўсмир ёшдаги 9-14 ёшгача бўлган қизларни папиллома вирусига қарши эмлаш ҳисобланади.
Жорий йилнинг май-июнь ойларида ВПЧ вакцина билан миллий эмлаш календари асосида 9 ёш ҳамда 12-14 ёшдаги қиз болалар ўртасида эмлаш ишлари олиб борилмоқда.
Вакциналар маъмурий ҳудудлар даволаш-профилактика муассасаларининг эмлаш пунктларига етказиб берилиши натижасида 288 минг нафар 9 ёш ҳамда 12-14 ёшдаги 854 минг нафар қиз ўртасида эмлаш ишлари давом этмоқда.
Республикада Вирусология ИТИ, Республика ихтисослаштирилган акушерлик ва гинекология илмий-амалий тиббиёт ва Республика ихтисослаштирилган онкология ва тиббий радиология илмий-амалий тиббиёт марказлари томонидан олиб борилаётган илмий тадқиқотлар шуни кўрсатадики, ВПЧ вакцинаси билан эмлаш жараёни амалиётга жорий этилиши натижасида йилига 1100 нафар аёл бачадон бўйни раки билан касалланишининг олди олинади. Қолаверса 583 нафар аёлнинг ҳаёти сақлаб қолинишига эришилади. Йилига ушбу вакцина билан эмлаш қамрови 90 фоиз миқдорда амалга оширилса 2050-2060 йилларга келиб бачадон бўйни раки касаллиги элиминация қилинади.
