Телеграм каналларнинг бирида фуқаролардан Корея Республикасига ишга кетиш учун тиббий кўрикка 17 млн сўм тўлов амалга оширилиши тўғрисида эълон қилинган мурожаат юзасидан Ташқи меҳнат миграцияси агентлиги қуйидагиларни маълум қилди:
"Аввало, таъкидлаш жоиз, ушбу тарқалган хабар ҳақиқатга тўғри келмайди.
Биринчидан, Корея Республикасига ишга кетиш билан боғлиқ барча тўловлар Ташқи меҳнат миграцияси агентлиги ходимларига эмас, банк махсус кассаларида амалга оширилади.
Иккинчидан, хабарда акс этган ва бошқа кўринишлардаги тўлов бланклари Ташқи меҳнат миграцияси агентлиги ходимлари томонидан фуқароларга берилмайди.
Ташқи меҳнат миграцияси агентлиги ўз ўрнида Корея Республикасида ишлаш истагидаги фуқаролар ўртасида бўлиб ўтадиган 2 босқичли имтиҳонларни ташкил этиш, жўнаб кетишдан олдин тайёрлаш, кўниктириш тадбирлари, махсус кийим ва тарқатма материаллар билан таъминлаш, кетиш ҳужжатларини расмийлашитириш, ташкилий тарзда кузатиш ва ушбу давлатда кутиб олиш жараёнларини амалга оширади.
Корея Республикасига ишга кетиш билан боғлиқ муаммо ёки саволлар юзага келганда Ташқи меҳнат миграцияси агентлигига мурожаат қилишингиз мумкин" дейилади муносабатда.
