13-18 сентябрь кунлари Тошкент шаҳрида “Ипак йўли дурдонаси” ХИВ Тошкент халқаро кинофестивали бўлиб ўтиши ва бу кинофестивал давомида турли жанрдаги янги фильмларнинг намойиш этилиши, дунёга машҳур киноижодкорлар, актёр ва актрисаларнинг ташрифи кутилмоқда.
Кинематография агентлиги ахборот хизмати фестивалда турк актёрлари делегацияси, жумладан, миллионлаб мухлисларнинг қалбидан жой олган актёр Бурак Ўзчивит ҳамда Нургул Ешилчайларнинг ҳам иштирок этишини маълум қилди.
Маълум бўлишича, улар Туркия делегацияси таркибида Тошкентга ташриф буюради ва бошқа турк актёрлари билан бирга кинофестивалнинг асосий тадбирларида иштирок этади. Жорий йилнинг 15 сентябрь куни Форумлар саройида тантанали равишда очиладиган “Турк киноси кунлари” шулар жумласидандир.
Туркия делегацияси Тошкентда бир қатор фильмлар намойишини ўтказиб, 16 сентябрь куни Урганч шаҳрига жўнаб кетади ва у ерда ҳам икки кун давомида ўз фильмларини намойиш этади.
Актёр Бурак Ўзчивит ҳам Инстаграм саҳифасида 14-15 сентябрь кунлари Ўзбекистонда бўлиши ҳақида гапирган.
“14-15 сентябрь кунлари Тошкент кинофестивалида иштирок этаман”, — деб ёзган актёр саҳифасига.
Турк актрисаси Нургул Ешилчай "Ишкомли уй", "Келин" "Муҳташам юз йил. Кўсем империяси" каби сериалллардаги бетакрор ижролари билан халқимиз қалбидан жой олгани шубҳасиз.
Шунингдек, актрисанинг "Муҳаббат ва жазо", "Тилкапора", "Қизил севги" фильмлари ҳам машҳурликка эришган.
