Ижтимоий тармоқларда қашқадарёлик сўконғич депутатнинг журналист билан суҳбати ёзиб олинган аудиоси тарқалди. Эслатиб ўтамиз, бир неча кун аввал айнан шу депутат ўқувчини калтаклаган эди. Аудиодан маълум бўлишича журналист шу масалага ойдинлик киритиш учун депутатга қўнғироқ қилган. Аммо эшитиб турганингиздек, депутат журналистни ҳам аяб ўтирмаган.
O’zLiDeP Қашқадарё вилоят Кенгаши Матбуот хизматининг маълум қилишича, партиянинг туман ҳамда Халқ депутатлари туман кенгашида депутатнинг масаласи кўрилган. Таъкидланишича, депутат Нуртоев Панжи Норбоевичнинг фермерлик йўналишдаги фаоллиги учун унинг номзоди дастлаб партия аъзолигига, кейинчалик халқ депутатлари туман кенгаши депутатлигига илгари сурилган. Лекин, депутатлар шу кунларда у томонидан содир этилган салбий ҳолатларни оқламаслигини айтишган.
Депутат томонидан мактаб ўқувчисини аёвсиз калтаклагани, қолаверса, мазкур воқеага аниқлик киритиш мақсадида унга мурожаат қилган журналистнинг саволларига ҳақоратли сўзлар билан жавоб қайтарганлиги учун партия сафидан чиқариш масаласи овозга қўйилган. Ушбу таклиф мажлис иштирокчилари томонидан қабул қилинган.
Шунингдек, П.Н.Нуртоев Ўзбекистон Республикасининг “Халқ депутатлари маҳаллий кенгаши депутатини, Ўзбекистон Республикаси Олий Мажлисининг Қонунчилик палатаси депутатини ва Сенати аъзосини чақириб олиш тўғрисида”ги Қонунининг 2-моддаси билан сиёсий партияларга берилган ваколатга асосланган ҳолда уни депутатликдан чақириб олиш борасида Халқ депутатлик Қамаши туман кенгашига тавсиянома киритиш масаласи ҳам овозга қўйилди ва иштирокчилар томонидан маъқулланди.
