Фарғона вилоятида "Қўқон" аэропортини реконструкция қилиш ишлари якунланди. Бу ҳақда Uzbekistan Airways хабар қилди.
Бугун, 20 март куни эрталаб аэропорт биринчи техник парвозни қабул қилди – “Uzbekistan Airways” авиакомпаниясининг А320 НЭО самолёти экипажи Қўқон аеропортига қўнди.
Вилоят аэропортида учиш-қўниш йўлаги 2000 метргача узайтирилди ҳамда А320 ва АТР72-600 русумли самолётлар учун иккита тўхташ жойига эга перрон реконструкция қилинди. Шунингдек, аеропортда 100 кишига мўлжалланган 900 кв.м майдонли янги йўловчи терминали қурилди.
“Uzbekistan Airways” авиакомпаниясининг тажрибали учувчилари томонидан Тошкент – Қўқон йўналиши бўйича амалга оширилган техник парвоз аеродромнинг самолётларни қабул қилиш ва жўнатишга ҳамда терминалнинг йўловчиларни қабул қилиш ва уларга хизмат кўрсатишга тўлиқ тайёрлигини кўрсатди.
Мунтазам парвозларни 2024 йил 1 апрелдан бошлаш режалаштирилган.
