Танимасни сийламас, деган нақл бор халқимизда. Бир неча йил истилода, бизга ҳар томонлама бегона империя соясида яшаган халқимиз ва мамлакатимизнинг ўзини дунёга танитганига анча бўлди.
Қаердансан, деб сўраган хорижликка “Ўзбекистонданман” десангиз, “Покистон, Афғонистон” дея қайта сўрамай қўйишганига анча бўлди. Мамлакатимизнинг дунёга юз очишида давлат тизимлари билан бирга халқ дипломатияси катта рол ўйнаб келди.
Зеро, давлат ва дипломатик алоқаларда барибир чекловлар, протоколлар ва ҳадиклар бўлади. Халқ дипломатияси эса норасмий ва турли тартиблардан холи йўл.
Одамларнинг ўзаро борди-келдилари, турли йўналишлардаги яқин муносабатлари баъзан дипломатик ташрифлардан кўра кўпроқ маънавий-сиёсий фойда келтиради.
Шунингдек, юртимизда ташкил этилаётган турли халқаро сиёсий-илмий ҳамда маданий тадбирлар айни шу халқ дипломатиясининг яна бир самарали жиҳати сифатида юртимиз имжини кўтариш, унинг инвестицион ва сайёҳлик салоҳиятини мустаҳкамлашга улкан ҳисса қўшмоқда.
27 апрель куни тарихий шаҳар Хивада очилган “Лазги” II халқаро рақс фестивали ҳам халқ дипломатияси руҳиятини ўзида мужассам қилган яна бир маданий платформага айланганини намоён қилди.
Фестивал доирасида “Хоразм “Лазги” рақси: маданий дипломатияни ривожлантиришнинг илмий-назарий, маънавий-маърифий тамойиллари” мавзусида ўтказилган илмий конференцияда таъкидланганидек, бу рақс фестивали халқ дипломатияси тушунчасига “Лазги дипломатияси”ни ҳам уйғунланлаштирмоқда.
Бу фестивал юртимиз санъати ва маданиятини жаҳонга танитиш, ўзаро алоқаларимизни янги ва ижобий даражага кўтаришимизга бевосита кўмаклашмоқда.
Конференция давомида Халқаро Туркий Маданият ташкилоти – TURKSOY Бош котиби Султан Раев томонидан ўзбек миллий рақс санъатига узоқ йиллар хизмат қилган фидойи устозлар Гавҳар Матёқубова, Зиёда Мадраҳимова, Карима Узоқоваларга TURKSOYкўкрак нишони топширилгани ҳам Лазги рақсининг халқлар ўртасидаги дўстликни мустаҳкамлашга ва халқаро муносабатларни яхшилашга қўшган ҳиссасининг исботи дея қараш мумкин.
Лазги фестивалини фақат халқ дипломатиясининг тантанаси дейиш тўғри бўлмайди. Чунки бу халқаро тадбир маъанавий бойлигимизни тиклаш ва асрашга, ёш авлодни буюк аждодларимизга муносиб қилиб тарбиялашга ҳам хизмат қилиши шубҳасиз.
Маданият вазири Озодбек Назарбеков ўз нутқида айтганидек, ватанимизнинг энг бебаҳо маданий бойликларидан бири, шубҳасиз, асрий анъаналарга эга миллий рақс санъатимиздир. Ушбу санъатнинг халқимиз маънавиятини юксалтириш, ёш авлодни миллий анъана ва қадриятлар руҳида тарбиялашдаги ўрни катта эканига шубҳа йўқ.
Шу боисдан ҳам юртимизда миллий рақс санъатини ривожлантиришга, рақс жамоалари ва мутахассисларни қўллаб-қувватлашга алоҳида эътибор қаратилмоқда.
Ҳар 2 йилда бир марта ўтказилаётган ушбу Лазги фестивалига дунёнинг 30 мамлакатидан келган турли фольклор рақс жамоалари лазги рақсини ўз талқинларида намойиш этади.
Айрим жамоалар эса ўз миллий рақсларини томошабинлар ҳамда ҳакамлар ҳайъати ҳукмига ҳавола этишади.
Фестиваль 30 апрелгача давом этди.
Абулфайз Сайидасқаров, Хивадан махсус тайёрланди
