Андижон ва Асака туманларида мактаб директорлари ишдан бўшатилди. бу ҳақда ҳуқуқ-тартибот идоралари хабар берди.
Маълум қилинишича, Андижон вилоятида ноқонуний диний таълим бериш билан боғлиқ ҳолатлар аниқланди.
Жумладан, Асака туманида истиқомат қилувчи, 1985 й.т. Г.Э. (аёл) ҳеч қандай махсус билимга эга бўлмасада, ўзининг яшаш хонадонида 2014-2016 йиллар оралиғида туғилган 5 нафар вояга етмаган ўғил болаларга ноқонуний равишда диний сабоқ бериб келган.
Болаларнинг 4 нафари маҳаллий, 1 нафари эса Қашқадарё вилоятидан келган.
Таъкидлаш лозимки, 2016 йилда Қашқадарё вилоятида туғилган боланинг ота-онаси фарзандининг ўқишини Г.Э. орқали 2023 йилнинг ноябрь ойида Асака туманидаги умумий ўрта таълим мактабларидан бирининг 2-синфига кўчиришган.
Мактаб директори эса болани ота-онасининг аризасисиз, тегишли буйруқ чиқармасдан ўқишга қабул қилган. Шунингдек, уни “ҳужра” шароитида диний таълим олаётганлигидан хабардор бўлсада, зарур чораларни кўрмаган.
Қашқадарёлик бола фуқаро Г.Э.нинг уйида яшаган ва диний сабоқ олган. Аммо, мазкур аёл томонидан муттасил калтакланиши оқибатида олган жароҳатлари туфайли, у шифохонага ётқизилган.
Ҳолат юзасидан Г.Э.га нисбатан Ўзбекистон Республикаси Жиноят Кодексининг 110-моддаси (қийнаш) 2-қисми “а,в” бандлари билан жиноят иши қўзғатилди.
Шунингдек, мактаб директорига нисбатан хизмат текшируви ўтказилиб, эгаллаб турган лавозимидан бўшатилди.
Болалардан бири Тошкент шаҳрида яшасада, ота-онасининг хоҳиши билан диний сабоқ олиши учун унинг ўқиши Андижон туманидаги умумий ўрта таълим мактабларидан бирига кўчирилган.
Афсуски, бола мактаб дарсларига қатнашмаган бўлсада, мазкур мактаб директори уни мажбурий таълимга жалб қилиш бўйича зарур чораларни кўрмаган.
Мактаб директорига нисбатан хизмат текшируви ўтказилиб, эгаллаб турган лавозимидан бўшатилди.
Фуқаро А.У.га нисбатан эса Ўзбекистон Республикаси Маъмурий жавобгарлик тўғрисидаги кодексининг 241-моддасига асосан маъмурий баённома расмийлаштирилди.
