Доғистон Республикаси пойтахти Махачқалъа шаҳрида кучли ёмғир оқибатида сув тошқини уч қаватли турар жой биносининг пойдевори ювилиб, бинонинг қулашига сабаб бўлди. Бу ҳақда “РИА Новости” хабар берди.
Шаҳар маъмурияти яна тўртта бинода қулаши хавфи борлиги ва тахминан 300 киши эвакуация қилинганини маълум қилди.
Ҳодиса бинолар дарё яқинида қурилгани туфайли содир бўлган.
Ёмғир республикадаги бошқа ҳудудларда ҳам муаммоларга сабаб бўлиб, 139 та қишлоқ электрсиз қолди, 50 дан ортиқ қишлоқда транспорт ҳаракати тўхтатилди ва 12 шаҳарлараро поезд қатнови бекор қилинди.
Маҳаллий ҳокимият органлари дарё ўзанларини тозалаш учун юқори даражада тайёргарлик кўрилганини хабар қилган. Шунингдек, пойтахтда фавқулодда ҳолат эълон қилинди.
