Тошкент шаҳри иссиқлик таъминоти оператори иситиш ва иссиқ сув хизматлари учун олдиндан тўлов қилиш тартиби ўзгарганини маълум қилди.
Янги қоидаларга кўра, аванс тўлови амалга оширилганда амалдаги тарифни сақлаб қолиш муддати 12 ойдан 2 ойгача қисқартирилди. Илгари истеъмолчилар бир йиллик тўловни олдиндан амалга ошириб, тариф ошган тақдирда ҳам эски нархдан фойдаланиши мумкин эди.
Эндиликда эса тўлов қилинган пайтдаги тариф фақат олдиндан тўланган хизмат ҳажми учун ва икки ой давомида амал қилади. Агар шу муддат ичида тарифлар ўзгарса, қайта ҳисоб-китоб қилинмайди.
Икки ойлик имтиёзли давр тугагач эса барча ҳисоб-китоблар амалдаги тарифлар асосида юритилади. Шу боис тарифлар ошишидан ҳимояланиш мақсадида бир йиллик аванс тўловини амалга ошириш амалиёти ўз аҳамиятини йўқотмоқда.
Мазкур ўзгаришлар марказлашган иситиш ва иссиқ сув таъминоти хизматларига тааллуқли бўлиб, аҳолига шахсий харажатларни режалаштиришда янги тартибни инобатга олиш тавсия этилди.
