Буюк Британия олимлари буни амалиётда яна бир бор тасдиқлашга эришди. Бу ҳақда ССВ матбуот хизмати “The Guardian” нашрига таяниб хабар бермоқда.
Қайд этилишича, лондонлик мутахассислар саъй-ҳаракати билан кўрликни келтириб чиқарувчи камёб генетик касаллик — туғма Лебер амаврозига чалинган 4 нафар боланинг қорачиқларига нур қайтди.
Бунинг учун кўриш қобилиятидан бебаҳра туғилган ўғил-қизларнинг кўз соҳасида илк бор ўта ноёб ҳисобланган ген микрохирургик операцияси ўтказилди.
Беморлар — АҚШ, Туркия ва Тунисда дунёга келган кичкинтойлар. Улар AIPL1 генидаги нуқсон туфайли туғилганидан буён кўриш қобилиятига эга эмас.
Лондон клиникаларидан бирида ўтказилган операция атиги 60 дақиқа давом этди. Шу вақт ичида зарарсиз вирус билан қопланган AIPL1 генининг соғлом версияси микрожарроҳлик усули ёрдамида жажжи беморлар кўз тўр пардасига жойлаштирилди.
Энди болалар объектларни бемалол ажрата олади. Оламни ёрқин рангларда кўра бошлади. Баъзилари, ҳатто, ўқиш ва ёзишга ҳам киришди.
Лондонлик офтальмолог, профессор Мишель Михаэлидеснинг фикрича, ушбу натижалар ҳайратланарли ҳамда келгусида ген терапияси имкониятларидан янада кенгроқ фойдаланиш учун асос бўлади.
