АҚШ ва Эрон ўртасида ядровий келишув бўйича музокаралар яна фаоллашди. Президент Дональд Трамп Эрон Олий раҳбари Оятуллоҳ Али Хоманаийга икки ойлик муддат бериб, ядровий дастур бўйича янги келишувга эришишни таклиф қилди. Агар бу муддат ичида келишувга эришилмаса, АҚШ ёки Исроил томонидан ҳарбий чоралар кўрилиши эҳтимоли юқори.
Теҳрон музокараларга тайёрлигини билдирган бўлса-да, уранни бойитиш ҳуқуқидан воз кечишни рад этмоқда. Эрон ташқи ишлар вазири Аббос Арақчийнинг таъкидлашича, уранни бойитиш Эроннинг ажралмас ҳуқуқи бўлиб, бу масала музокаралар учун ёпиқ. Шунингдек, Эрон АҚШнинг уран захираларини учинчи давлатга, масалан, Россияга топшириш таклифини ҳам рад этмоқда.
АҚШнинг ўзида ҳам бу масала бўйича ички сиёсий ихтилофлар мавжуд. Вице-президент Вэнс бошчилигидаги гуруҳ дипломатик ечим тарафдори бўлса, Миллий хавфсизлик маслаҳатчиси Майк Уолтц ва давлат котиби Марко Рубио қатъийроқ позицияни эгаллаб, Эронга нисбатан қаттиқ чоралар кўришни талаб қилмоқда .
Агар музокаралар муваффақиятли якунланса, Эронга нисбатан санкциялар юмшатилиши ва иқтисодий ҳолат яхшиланиши мумкин. Аммо келишувга эришилмаса, АҚШ ва Исроил томонидан ҳарбий зарбалар хавфи ортади. Бу эса минтақадаги беқарорликни кучайтиради ва Эрон иқтисодиётига жиддий таъсир кўрсатиши мумкин.
Абдуллоҳ Саййид
