Литва марказий осиёлик муҳожирлага мавсумий ишлаш учун рухсатномалар беришни деярли уч баравар оширди. Бу ҳақда мамлакатнинг Бандлик хизмати хабар берди.
Маълум қилинишича, йилнинг биринчи чорагида 363 та шундай рухсатнома берилган. 2024 йилнинг шу даврида бу рақам 122 тани ташкил этган. Гувоҳномаларда эркакларнинг улуши 91 фоиз, аёлларники 9 фоиздир. Энг кўп рухсатнома қуйидаги давлатлар фуқароларига берилган:
- Ўзбекистон – 42 фоиз;
- Тожикистон – 34 фоиз;
- Қирғизистон – 6 фоиз.
Уларнинг 53 фоизи йўл қурилишида ишлаган, 14 фоизи ошпаз бўлган, 7 фоизи қассоб, 5 фоизи эса қулупнай терувчи, фаррошлар ва қурилиш ишчилари бўлиб ишлаган.
Литва меҳнат бозори бу ерга пул ишлаш мақсадида вақтинчалик ишлаш учун келган чет элликлар учун тобора кўпроқ очилмоқда, деди Бандлик хизматининг хорижликларга хизмат кўрсатиш бўлими бошлиғи Эрнест Варнайте.
Мамлакатда 2025 йил 1 апрель ҳолатига кўра 137 та давлатдан келган 145,8 минг нафар хорижлик меҳнат қилмоқда. Бунда энг кўп ҳисса Украина (47,5 минг), Беларусь (47,3 минг), Ўзбекистон (9,1 минг) ва Тожикистон (6,5 минг) давлатларига тўғри келган.
Маълумот ўрнида, Литва Марказий Осиё фуқаролари учун миграция сиёсатини кучайтиради. Минтақа давлатларининг ўнга яқин фуқаросига террорчилик ташкилотлари билан алоқаси ва радикаллашуви эҳтимоли туфайли Литвага кириш тақиқланган. Литва бош вазири виза бериш жараёнида энди маданий яқинликка кўпроқ эътибор қаратиш кераклигини айтганди.
