Харков мери Игор Тереховнинг баёнотига кўра, Россия армияси Украина ҳудудига қарши илк бор янги русумдаги “Черника” дронларидан фойдаланган. Унга кўра, сўнгги ҳафталарда шаҳарга фақат “Шаҳед”лар эмас, балки нишонга аниқ йўналтириладиган “Черника” дронлари ҳам ҳужум қилган.
Терехов бу ҳужумлар Харковга ва кенгроқ олганда, Украинага қилинган илк шундай зарбалар эканини таъкидлади. Маълумотларга кўра, ушбу дронлардан бири гараж кооперативи ҳудудига тушган ва бир нечта автомобилга зарар етказган.
Украина ҳарбий таҳлилчилари томонидан илгари хабар қилинган “Черника” дронлари икки хил версияда ишлаб чиқарилади: енгил (“Черника-1”) ва оғир (“Черника-2”). Иккинчи модель мустаҳкам мудофаа нуқталарини ва оғир ҳарбий техникани нишонга олиш учун мўлжалланган бўлиб, 100 километргача масофани босиб ўтиши мумкин.
Россия томон ҳозирча бу дронлардан фойдаланиш борасида расмий баёнот бермаган. Украина томони эса бу янги хавфга қарши қандай чоралар кўрилаётгани ҳақида маълумот бермаган.
