Бугун, 21 июль тонгида Россия армияси томонидан амалга оширилган кенг миқёсли ҳужумлар натижасида Киев ва бошқа бир қатор ҳудудларда вайронагарчилик юз берди.
Пойтахт Киевда бир нечта туманларда дрон парчаларининг қулаши оқибатида ёнғинлар содир бўлди. Шевченкивскйи туманида кўп қаватли уйнинг балконида ёнғин чиққан. Днипровскйи туманида савдо дўконлари ёниб кетган, Свжатошйнскйи ва Дарнйтскйи туманларида эса гаражлар ва ҳатто болалар боғчаси ҳудуди олов ичида қолган.
Расмий маълумотларга кўра, ҳужум оқибатида бир киши ҳалок бўлган, яна бир неча фуқаро тан жароҳати олган. Киев мери Виталий Кличко ҳолатга муносабат билдириб, икки кишининг жабрланганини, улардан бирига воқеа жойида тиббий ёрдам кўрсатилганини айтди. Шунингдек, Оболонскйи ва Соломянскйи туманлари ҳам зарба остида қолган. “Лукянивска” метро бекатининг кириш қисми зарар кўрган, шаҳарнинг айрим кўчаларида ҳаракат вақтинча тўхтатилган.
Ивано-Франкивскда ҳам инфратузилма жиддий зарар кўрган. Шаҳар мери Руслан Мартсинкивнинг таъкидлашича, бу – уруш бошланганидан бери шаҳарга қилинган энг кенг қамровли ҳужум бўлган.
Харковда эса Россия дронлари 11-12 маротаба зарба бергани айтилмоқда. Маҳаллий ҳокимият маълумотига кўра, бир неча турар-жой биноларининг ойналари синиб кетган, йўллар, трамвай излари ва электр тармоқлари шикастланган. Жабрланганлар ҳақида ҳозирча маълумот йўқ.
Днепропетровск вилоятида ҳам ҳужумлар давом этган. Вилоят раҳбари Сергей Лысакнинг айтишича, дронлар завод, ёқилғи қуйиш шохобчаси ва инфратузилма объектларини вайрон қилган. Икки автомобиль ёниб кетган.
Мазкур ҳужумлар Украина аҳолисининг кундалик ҳаёти яна хавф остида қолаётганини эслатмоқда. Тинч аҳолига етаётган зарар ортидан бошланган расмий суриштирувлар давом этмоқда.
