Бугун, 21 июль куни пойтахтда “ИТ ва рақамли таълимни ривожлантириш форуми” бўлиб ўтди. Тадбир давомида IT соҳасидаги долзарб муаммолар муҳокама қилиниб, “Ўзбекистонда IT ва рақамли таълим ландшафтини яхшилаш” лойиҳаси доирасида ўтказилган йирик тадқиқот натижалари эълон қилинди.
Форумда тақдим этилган сўровнома натижалари эътиборга молик: мамлакат бўйлаб 4 мингдан ортиқ фуқаро иштирок этган тадқиқотда респондентларнинг 97 фоизи рақамли кўникмаларни иш унумдорлигининг асосий омили, деб ҳисоблаган. 96 фоиз эса IT соҳасига қизиқишини билдирган.
Иштирокчилар ўз рақамли саводхонлигини қуйидагича баҳолаган:
— Аъло – 17 фоиз
— Яхши – 44 фоиз
— Қониқарли – 32 фоиз
Бундан ташқари, 57 фоиз ҳар ҳафта видеоалоқа воситаларидан фойдаланишини, 78 фоиз эса ҳар ой электрон ҳукумат хизматларидан фойдаланишини билдирган.
Онлайн харид қилиш бўйича эса натижалар қуйидагича: 52,4 фоиз – ойига 2-3 марта харид қилади. 25 фоиз – йилига 2-3 марта, 22 фоиз – умуман фойдаланмайди.
Форумда IT Education Association ва Швейсария тараққиёт агентлиги (СДC) ҳамкорлигида тайёрланган “Келажак касблари атласи” тақдим этилди. Унда меҳнат бозори таҳлилига асосланган 45 та истиқболли IT касб келтирилган.
Мутахассисларнинг айтишича, бу атлас ёшларга, ота-оналарга ва таълим муассасаларига йўналтирувчи восита бўлиб хизмат қилади.
Форумда яна бир муҳим янгилик сифатида — бепул IT таълим ресурслари, касбий йўналтириш ва тадқиқот маълумотларини бирлаштирувчи DigiSurvey.uz платформаси тақдим этилди.
