Ўзбекистон чегарасида талабга бўйсунмаган 2 нафар қирғизистонлик ҳалок бўлди. Бу ҳақда Қирғизистон Миллий хавфсизлик давлат қўмитаси Чегара хизмати маълум қилди.
Маълум қилинишича, 25-август куни Чотқол тумани Айғир-Жал қишлоғида яшовчи икки киши бедарак йўқолгани ҳақида хабар келиб тушган.
28 август куни ишчи учрашув доирасида Ўзбекистон томонининг чегара вакиллари 15-август куни Ўзбекистон ҳудудида, Қирғизистон, Ўзбекистон ва Қозоғистон чегаралари туташган жойда Ўзбекистон чегара қоровуллари томонидан икки нафар номаълум шахс аниқлангани ҳақида хабар берган.
“Ўзбекистон томонининг маълумотларига кўра, уларни ушлашга уриниш чоғида чегарачилар талабларга бўйсунмаганлиги сабабли қурол ишлатишга мажбур бўлган. Натижада иккала фуқаро ҳам ҳаёт билан чиқишмас ўқ яралар олган", дейилади хабарда.
Йўқолган фуқароларнинг қариндошлари 31-август куни Ўзбекистонга бориб, уларни таниб олишган.
“Бугун, 1-сентябр куни “Баймак” назорат-ўтказиш пункти орқали Қирғизистон Республикасининг икки фуқароси жасади Қирғизистон томонига топширилди ва экспертиза ўтказиш учун Кербен шаҳридаги морга етказилди”, дейилади хабарда.
Таъкидланишича, Қирғизистон ва Ўзбекистон чегара идоралари раҳбарлари 2-сентябрдан бошлаб жойида қўшма текширув ўтказишга келишиб олишган. Бундан ташқари, Ўзбекистон томони ҳалок бўлган фуқароларнинг топилган мулки - учта от ва чодирни Қирғизистон Республикасига топширишга тайёрлигини билдирган.
