Россия фуқаролари 15 сентябрдан бошлаб Хитойга визасиз ташриф буюриши мумкин. Бу ҳақда Хитой Ташқи ишлар вазирлиги вакили Го Сзякун маълум қилди.
Билдирилишича, Россияликлар визасиз равишда 30 кунгача Хитойда бўла олади. Режим бир йил амал қилади, яъни у 2026 йил 14 сентябрда бекор қилиниши ёки узайтирилиши мумкин. Ушбу тартиб сайёҳлик, ишбилармонлик, қариндошларни кўриш ва айирбошлаш дастурлари доирасида ташриф буюрувчиларга тааллуқли.
Илгари россияликлар Хитойга фақат сайёҳлик гуруҳлари орқали визасиз бора оларди. Энди эса россияликлар илгари ёпиқ бўлган ҳудудларга ҳам бора олиши мумкин, масалан, Шинжон-Уйғур автоном райони. Аммо Тибетга саёҳат қилиш учун аввалгидек махсус рухсатнома талаб этилади. Россия туроператорлари ассоциацияси (АТОР) бу қарор сайёҳлар оқимини 30–40 фоизга оширишини кутмоқда.
“Хитой икки мамлакат халқлари ўртасидаги алоқаларни фаоллаштиришга катта эътибор қаратмоқда, ўзаро ҳамкорликни мустаҳкамлашни қўллаб-қувватламоқда, кенг қамровли стратегик шерикликни ривожлантиришга ижобий ҳисса қўшмоқда... Биз янада кўпроқ россиялик дўстларимиз Хитойга ташриф буюришларини маъқуллаймиз”,— деган Го.
Россия президенти Владимир Путин 31 август куни Хитойга тўрт кунлик ташриф билан борди. У “Синхуа” агентлигига берган интервьюсида 2024 йил якунига кўра, икки давлат ўртасидаги сайёҳлик оқими 2,5 баробарга ошиб, 2,8 миллион кишига етганини айтди.
