Жанубий Кореяда ёлғиз қолган кексаларга психологик ёрдам кўрсатиш мақсадида ChatGPT сунъий интеллекти ўрнатилган робот қўғирчоқлар берила бошлади.
Маълум қилинишича, ушбу қўғирчоқлар суҳбатдоши билан эркин мулоқот қилади, дори ичиш ва овқатланиш кабиларни эслатиб туради ҳамда махсус сенсорлари орқали эгаларининг соғлиғини кузатиб боради, деб ёзади Rest of World нашри.
Мамлакат бўйлаб юзлаб нафақахўрлар давлат томонидан Ҳёдол номли бундай қўғирчоқларни олишган. Ҳукумат ушбу ташаббус орқали кексаларнинг ёлғизлик муаммосини енгиллаштиришни мақсад қилган.
Бу қарор Кореяда юзага келаётган демографик муаммолар билан боғлиқ. Сўнгги йилларда мамлакатда туғилиш даражаси кескин пасайиб, аҳолининг аксарият қисмини ўрта ёшлилардан кўра кўпроқ кексалар ташкил этмоқда. Фарзандлар ва набиралар эса иш ва карерани йўлга қўйиш билан банд бўлиб, ота-оналари билан етарли вақт ўтказа олмаяпти.
Бундан ташқари, ижтимоий парвариш тизими ҳам нафақахўрларни тўлиқ қамраб ололмаяпти. Бу соҳадаги кадрларнинг танқислиги Жанубий Кореяда яна бир муаммони келтириб чиқармоқда. Хусусан, 2023 йилда мамлакатда 190 минг нафар кексаларни парвариш қиладиган ходим етишмаётгани қайд этилди. Мутахассисларнинг ҳисоб-китобига кўра, 2032 йилга бориб бу рақам 1,55 миллионга ошиши мумкин.
Шу сабабли маҳаллий ҳокимият органлари нафақахўрларга Ҳёдол қўғирчоқларини тарқатмоқда. Уларга ўрнатилган ички микрофонлар суҳбатларни ёзиб, маълумотларни ижтимоий ходимларга юборади. Агар кутилмаган вазият юз берса, мутахассислар тезкор чоралар кўради.
Йиғилган барча маълумотлар махфий сақланади ва махсус булут тизимида уч йилга архивланади. Қўғирчоқлардаги сенсорлар эса фойдаланувчининг жойлашуви ва хатти-ҳаракатини кузатиб туради. Бу эса қўғирчоқларни сотиб юборилишнинг олдини олади.
Hyodol компанияси келгусида халқаро бозорга чиқишни ҳам мақсад қилган. Режага кўра, 2026 йилдан бошлаб АҚШда кенг кўламли ишлаб чиқариш ва савдо ишлари бошланади.
