5 сентябрь куни Андижон туманида жойлашган автомобилларга газ тўлдириш шохобчасида ёнғин юз берди. Фавқулодда вазиятлар бошқармаси ҳодисада жабрланганлар йўқлигини билдирди.
Вилоят ФВБ хабарига кўра, тахминан 5 тонна сиғимга эга MAN русумли ёқилғи ташувчи автомобилдан пропан газини тўкиш жараёнида технологик қоидалар бузилган. Натижада ёнғин келиб чиққан.
Воқеа ҳақида соат 12:05 да хабар келиб тушган. Ёнғин-қутқарув бригадалари 8 дақиқада, соат 12:13 да ҳодиса жойига етиб бориб, оловни 12:26 да ўраб олган ва 13:03 да тўлиқ ўчирилган.
Расмийларга кўра, ёнғин оқибатида тан жароҳати олганлар йўқ. Ҳолат юзасидан суриштирув ишлари олиб борилмоқда.
