Фармонга мувофиқ, 2026 йил 1 июлдан пенсиялар, нафақалар, шунингдек, Ижтимоий реестрга киритилган оилаларга тўланадиган болалар нафақаси ва моддий ёрдам миқдори 7 фоизга оширилади.
Шундан сўнг ёшга доир энг кам пенсия миқдори ойига 983 минг сўмни ташкил этади. Ногиронлик пенсиясининг энг кам миқдори эса 1 миллион 83 минг сўмга етказилади. Пенсияни ҳисоблашнинг базавий миқдори 504 минг сўм этиб белгиланади.
Ижтимоий реестрга киритилган оилалар учун болалар нафақаси ҳам оширилади. Хусусан, 3 ёшгача бўлган битта фарзанд учун ойига 386 минг сўм, 3 ёшдан 18 ёшгача бўлган битта фарзанд учун эса 295 минг сўм тўланади. Иккинчи фарзанд учун қўшимча 177 минг сўм, учинчи ва ундан кейинги ҳар бир фарзанд учун эса қўшимча 118 минг сўм ажратилади. Моддий ёрдамнинг ойлик миқдори 450 минг сўм этиб белгиланади.
Шунингдек, 2026 йил 1 сентябрдан бюджет ташкилотлари ходимларининг иш ҳақи ҳамда талабалар стипендиялари 7 фоизга оширилади.
Фармонга кўра, шу санадан бошлаб меҳнатга ҳақ тўлашнинг энг кам миқдори ойига 1 миллион 360 минг сўм, базавий ҳисоблаш миқдори эса 440 минг сўм этиб белгиланади.
Мазкур қарорни амалга ошириш билан боғлиқ харажатлар давлат бюджети ҳамда Иқтисодиёт ва молия вазирлиги ҳузуридаги Бюджетдан ташқари пенсия жамғармаси маблағлари ҳисобидан қопланади.
