Фарғона вилояти Олтиариқ туманида хотини ва қайнонасини ўлдирган эркакка суд ҳукми ўқилди. Бу ҳақда Олий суд ахборот хизмати раҳбари Азиз Абидов хабар берди.
Хабарга кўра, аёл биринчи турмуши ўхшамагач, иккинчи марта 2024 йилнинг июль ойида шаръий никоҳ асосида оила қуради ва 4 ой давомида эри билан яшайди. Шу йилнинг ноябр ойида эса у жанжал сабабли фарзанди билан ота уйига қайтган. Ўша вақтда аёл ҳомиладор бўлган.
Қотиллик содир бўлган куни у онаси ва вояга етмаган фарзанди ҳамроҳлигида эри билан яшаган ижара уйига буюмларини олиш учун борган. Шу вақтда эркак қайнонаси ва аёлига пичоқ билан оғир тан жароҳати етказиб, воқеа жойидан қочиб кетган.
Бундан ташқари, қотилликка қўл урган шахс хотининг хорижга чиқиш биометрик паспорти, аёлнинг биринчи турмушидан бўлган қизининг туғилганлик ҳақидаги гувоҳномаси ва бошқа ҳужжатларни бўлакларга бўлиб ташлагани аниқланган.
Суд ҳукми билан айбланувчига нисбатан Жиноят кодексининг тегишли моддаларига асосан 15 йилу 6 ой муддатга озодликдан маҳрум қилиш жазоси тайинланди.
