Тошкентда BYD ва Gentra ҳайдовчилари йўл талашиб жанжаллашди. Ҳолат юзасидан Тошкент шаҳар ИИББ расмий маълумот берди.
Хабарга кўра, жорий йилнинг 19 март куни Яккасарой тумани Муқимий кўчасида BYD ва Gentra автомашиналари ҳайдовчилари ўртасида келиб чиққан можарода ҳомиладор аёл тан жароҳати олиб, ўз фарзандидан айрилди.
Тақдим этилган маълумотларга кўра, воқеа ҳайдовчилардан бири йўлнинг ўнг бўлагига ўтишга уриниб қолганида бошланган. Можаро давомида BYD ҳайдовчиси ва унинг яқин қариндоши иккинчи ҳайдовчига ҳужум қилиб, автомобиль ойналарини синдирган ҳамда унинг ҳомиладор турмуш ўртоғига жисмоний тажовуз қилган.
Тошкент шаҳар Ички ишлар бош бошқармаси мазкур ҳолат юзасидан Ўзбекистон Республикаси Жиноят кодексининг “Безорилик” моддаси бўйича жиноят иши қўзғатилганини маълум қилди. Ҳодисанинг барча иштирокчилари қўлга олинган.
Ҳомила нобуд бўлишининг аниқ сабабларини аниқлаш учун суд-тиббий экспертиза тайинланган. Мутахассислар хулосаси чиққанидан сўнг, жиноят ишининг ҳуқуқий малакаси қайта кўриб чиқилиши мумкин.
