Оқ уй Дональд Трамп маъмуриятининг туғма фуқароликни бекор қилишга оид фармонини кучда қолдириш учун АҚШ Олий судига мурожаат қилди, дея ёзмоқда "Zamon.uz". 2025 йил 26 сентябрда юборилган мурожаат шу масалада бир йил ичида олий судга иккинчи марта қайрилиш ҳисобланади.
2025 йил 20 январда имзоланган фармонга кўра, АҚШ ҳудудида ноқонуний мигрантлар ёки вақтинчалик чет эллик фуқаролардан туғилган болаларга автоматик равишда фуқаролик ҳуқуқи берилиши тақиқланади. Маъмурият бундай амалиётни 14-тузатишнинг “нотўғри талқини” деб ҳисоблаб, уни мамлакат учун “салбий оқибатларга олиб келувчи” омил сифатида баҳоламоқда.
Қуйи судлар ҳозирга қадар мазкур сиёсатни бир неча бор тўхтатиб қўйган. Июл ойида Сан-Франциско апелляция суди федерал судьянинг АҚШ бўйлаб Трамп фармонини блоклаш ҳақидаги қарорини тасдиқлаган эди. Шу ойда Нью-Ҳемпшир судьяси ҳам ACLU даъвосини қондириб, фармоннинг янги туғилган чақалоқларга татбиқ этилишига тўсқинлик қилди.
Оқ уй ушбу сиёсат охир-оқибат Олий суд томонидан қўллаб-қувватланишига умид қилмоқда. Бироқ масалани кўриб чиқиш учун зарур бўлган тўрт судья овози таъминланиши номаълумлигича қолмоқда.
Ҳимоячилар фармонни конституцияга зид деб ҳисобламоқда. ACLU вакили Коди Вофси уни “ноқонуний” дея атаган. Мазкур масалада 1898 йилда Олий суднинг Вонг Ким Арк иши бўйича чиқарган қарори прецедент бўлиб хизмат қилмоқда. Ўшанда суд АҚШда туғилган хитойлик муҳожирларнинг фарзандларига фуқаролик ҳуқуқини тан олган эди.
