Рус нашрларида Ўзбекистондаги Air Samarkand авикомпанияси 50 нафарга яқин россиялик ходимига уч ойдан бери ойлик тўламаётгани ҳақида ёзди.
Бугун, 29-сенябр куни Air Samarkand мазкур хабарда келтирилган ҳолатни изоҳлади. Авиакомпания ҳақиқатан ҳам иш ҳақи тўловлари кечикаётганини тан олган. Бунга нималар сабаб бўлганини тушунтиришга уринган.
“2025 йил баҳор ва ёз ойларида бутун ҳаво кемалари парки режадан ташқари техник хизматдан ўтказилди. Бу эса қисқа муддатларда сезиларли ва режалаштирилмаган харажатларни талаб қилди. Раҳбарият олдидаги устувор вазифа — иш ҳақи бўйича қарздорликни имкон қадар қисқа муддатда қоплаш ва вазиятни барқарорлаштириш”, — дейилади манбада.
Авиакомпания харажатларни қисқартириб, иш ҳақи тўловларига устуворлик берилаётганини ҳам таʼкидлаган.
“Аир Самаркандда турли мамлакатлардан бўлган мутахассислар меҳнат қилади. Меҳнатга ҳақ тўлаш бўйича мажбуриятлар фуқаролик, лавозим, иш стажи ва бошқа омиллардан қатʼи назар, барчага бир хил тартибда бажарилади. Шошилинч ҳаётий вазиятларда ходимларга бирламчи молиявий ёрдам кўрсатилади. Тўловлар жараёни ва авиакомпаниянинг асосий қадамларига доир ахборотни жамоага тўғридан-тўғри етказиб борамиз, очиқ мулоқотни қўллаб-қувватлаймиз”, дейилади баёнотда.
