Филиппиннинг марказий қисмида жойлашган ўрта мактабда содир бўлган қуролли ҳужум оқибатида уч нафар ўқувчи ҳалок бўлди, яна етти киши турли даражада жароҳат олди. Бу ҳақда Associated Press агентлиги хабар берди.
Маълум қилинишича, ҳодиса 22 июнь куни эрталаб Таклобан шаҳридаги San Jose National High School мактабида содир бўлган. Дастлабки маълумотларга кўра, 14 ва 15 ёшли икки нафар ўқувчи ўқотар қуроллардан фойдаланиб, мактаб ҳудудида ўт очган.
Минтақавий полиция бошлиғи Жейсон Капойнинг билдиришича, ҳужум қилганлар ҳам, қурбонлар ҳам мазкур таълим муассасаси ўқувчилари бўлган.
Қайд этилишича, гумонланувчилар ҳодисадан кўп ўтмай қўлга олинган. Дастлабки сўроқлар давомида улар мактабда мунтазам таҳқир ва тазйиққа учраганликларини айтган. Бироқ ҳуқуқни муҳофаза қилувчи органлар мазкур иддаолар юзасидан ҳозирча қўшимча маълумот бермаган.
Тергов маълумотларига кўра, ўсмирларнинг муқаддам судланмагани аниқланган. Шунингдек, улар ҳужумда ишлатилган 9 миллиметрли тўппонча ва 38 калибрли револьверни қаердан олгани ҳозирча номаълумлигича қолмоқда.
Полициянинг билдиришича, мактабда бир вақтнинг ўзида бир нечта кириш-чиқиш нуқталарини назорат қилувчи атиги битта қўриқчи бўлгани сабабли қуролларни таълим муассасаси ҳудудига олиб кириш имкони пайдо бўлган.
Ҳуқуқ-тартибот идоралари маълумотларига кўра, гумонланувчилар дастлаб синфхоналардан бирига кириб ўт очган. Кейинчалик уларнинг айрим жабрланувчиларни бошқа хоналаргача таъқиб қилгани тахмин қилинмоқда.
Филиппин Президенти Фердинанд Маркос ҳодиса юзасидан ҳар томонлама тергов ўтказишни буюрган. Шунингдек, мамлакатдаги барча мактаблар, иш жойлари ва жамоат жойларида хавфсизлик чораларини кучайтириш топширилган.
Президент администрацияси вакиллари давлат раҳбари мазкур фожиадан чуқур қайғуга тушганини билдириб, ҳалок бўлганларнинг оила аъзоларига ҳамдардлик изҳор этган.
