Афғонистонда мамлакат бўйлаб интернет ва телекоммуникация хизматлари чекланиши ортидан аксар телеканаллар фаолияти чекланди. Бу ҳақда “Afghanistan International” хабар берди.
TOLO, Lemar, TOLOnews, Shamshad, Тамадон ҳамда бир қатор телеканаллар илгари интернет орқали узатилган дастурларини эфирдан узиб қўйган. Фақатгина “Толибон” назоратидаги Radio Television Afghanistan (РТА), Maarif ва RTA Sport каби каналлар онлайн эфир узатмоқда.
Мамлакатда интернет узиб қўйилиши Moby Гроупъга қарашли TOLOnews, TOLO, Lemar, Arman ва Аракозия телеканалларининг фаолиятига жиддий таъсир кўрсатган. Интернет ва телекоммуникация хизматларини тўхтатиш тўғрисидаги қарор “Толибон” бошқарувидаги Афғонистон телекоммуникацияларини назорат қилиш агентлиги ҳамда Алоқа ва ахборот технологиялари вазирлиги томонидан қабул қилинган. Манбаларнинг маълумот беришича, Roshan, Etisalat, Afghan Wireless ва Afghan Telecom каби йирик провайдерларга барча оптик толали тармоқлар фаолиятини тўхтатиш буюрилган.
Техник мутахассисларга кўра, оптик толали тармоқнинг ўчирилиши мамлакат бўйлаб телекоммуникация минораларининг фаолиятини тўхтатиб, Афғонистонни жаҳон коммуникациясидан бутунлай узиб қўйган. Баъзи манбаларнинг таъкидлашича, чекланган хизматлар кейинчалик қайта тикланиши мумкин. Аммо юқори тезликдаги интернет ва оптик толали алоқа “Толибон” олий раҳбарининг буйруғига биноан тўлиқ тўхтатилган.
