Ҳормуз бўғозида юзага келган зўравонликлар ва АҚШ ҳамда Эрон ўртасидаги таранглик сабаб жаҳон нефть бозорида нархлар кескин кўтарилди.
Жаҳон бозорида асосий кўрсаткич ҳисобланган Brent нефти нархи қарийб 6 фоизга ўсиб, баррели 114 доллардан ошди. Кейинчалик эса нархлар бироз пасайиб, 113 доллар атрофида савдо қилинди.
Нархларнинг ўсиши АҚШ ҳарбийлари Эронга тегишли бир нечта қайиқларни йўқ қилганини маълум қилганидан сўнг кузатилди. Шу билан бирга, БАА ҳудудига ракета ва дрон ҳужумлари бўлгани ҳақида хабарлар ҳам вазиятни янада кескинлаштирди.
Эрон томони эса бу даъволарни рад этиб, уларни нотўғри маълумот деб атади.
Мутахассисларга кўра, бозордаги ўсиш нефть инфратузилмасига зарар етиши ва стратегик аҳамиятга эга Ҳормуз бўғози ёпилиб қолиши мумкинлиги ҳақидаги хавотирлар билан боғлиқ.
Айни пайтда, хавфсизлик муаммолари сабаб кемаларнинг ушбу йўлдан ҳаракатланиши секинлашган ва денгиз қатнови ҳали тўлиқ тиклангани йўқ.
