АҚШ президенти Доналд Трамп Украинадаги урушни тугатиш учун Владимир Зеленский ва Владимир Путин учрашиши керак, деган фикридан қайтмаган. Трамп Украина ва Россия етакчилари биргаликда тинчлик учун курашиши лозим деб ҳисоблайди.
Америка етакчисининг фикрича, урушни тугатишга кучли позицияда турибгина эришиш мумкин. У Россия қирғоқларига битта ёки иккита сувости кемаси жойлаштиришни буюрганини таъкидлаб, АҚШнинг ядро арсенали модернизация қилинганини эслатди. Трамп яна бир бор Россияни “қоғоз йўлбарс” деб атади ва Путиндан кўнгли қолганини қўшимча қилди. Сабаби, Қўшма Штатлар раҳбари Украинадаги уруш тезда тугашига умид қилган.
Трамп маъмуриятининг ҳаракатларига қарамай, Ғазода ҳам, Украинада ҳам тинчликка эришиш қийин бўлаётганини тан олди. Шунингдек, у ҲАМАС АҚШ томонидан таклиф этилган келишувни қабул қилиши лозимлигини айтди.
“ҲАМАС тинчлик келишувига рози бўлиши шарт. Агар улар келишувни қабул қилмаса, жуда қийин бўлади”, — деган Трамп.
Доналд Трамп ва мудофаа вазири Пит Хегсет армия генералларига урушга тайёр туриш кераклигини таъкидлади. Бундан ташқари, Америка президенти Тинчлик учун Нобел мукофотига лойиқ эканини қайд этди.
