Россия президенти Владимир Путин Европа Иттифоқи Россиянинг музлатилган маблағларини Украина фойдасига ишлатса, мамлакат ҳудудида қолаётган хорижий активларни миллийлаштириш тўғрисида фармон имзолади.
Бу қарор Европа Иттифоқида Россия Марказий банки маблағларидан Украинани молиявий қўллаб-қувватлаш учун фойдаланиш масаласи муҳокама қилинаётгани фонида қабул қилинган.
Манбага кўра, гап Россияда ҳануз фаолият юритаётган йирик хорижий компаниялар — UniCredit, Raiffeisen Bank International, PepsiCo ва Mondelez International активларини тезкор тарзда сотиб олиш ёки мусодара қилиш ҳақида бормоқда.
Эслатиб ўтамиз, сентабр охирида ЙИ раҳбарлари Украина учун музлатилган Россия резервлари ҳисобидан 140 млрд евро миқдорида кредит ажратиш режаси устида келишиб олганди. Москва эса бу ташаббусни “ўғрилик” деб атаган.
