ChatGPT яратувчиси бўлган OpenAI дунёдаги энг қиммат хусусий компанияга айланди. Унинг қиймати 500 миллиард долларга баҳоланмоқда. Бу ҳақда Bloomberg ва Reuters агентликлари хабар берди.
Маълум қилинишича, 2025 йил июль ойи ҳолатига кўра, ChatGPT тахминан 700 миллион ҳафталик фаол фойдаланувчига эга. Платформада ҳафтада 18 миллиард хабар алмашилган.
Компания ходимлари инвесторларга тахминан 6,6 миллиард долларлик акцияларни сотган. Дастлаб акцияларни тахминан 10,3 миллиард долларга сотишга рухсат берган, бироқ кўпчилик бизнеснинг истиқболига ишонч билдирган ҳолда бундай қилмасликка қарор қилган.
Акцияларни сотиш натижасида компаниянинг қиймати Илон Маскнинг SpaceX компанияси қийматидан ошиб кетди. SpaceX тахминан 400 миллиард долларга баҳоланган бўлиб, ҳозир у рўйхатда иккинчи ўринда туради. Учинчи ўринда эса Tik Tok эгаси ўрин олган.
Илон Маск компанияни 97,5 млрд долларга сотиб олмоқчи бўлган. Бизнесмен 2015 йилда компания асосчилари қаторида бўлган. У 2018 йилда келишмовчиликлар туфайли компания директорлар кенгашини тарк этган. Миллиардер 2024 йилда OpenAIга қарши даъво қўзғатган. У компаниянинг тижорат бўлинмасини ташкил этиши ва Microsoft билан ҳамкорлик қилиши дастлабки мақсадига зид эканини таъкидлаган.
Декабрь ойида OpenAI ҳужжат эълон қилиб, унда Маскнинг ўзи компанияни тижорат ташкилотига айлантиришни қўллаб-қувватлаганини очиқлаган. Бироқ Маск компания устидан назоратни қўлга кирита олмагани сабабли бу ғоядан воз кечган.
Bloomberg таъкидлашича, OpenAI қийматининг ошиши сунъий интеллект соҳасидаги технология етакчилари атрофидаги “инвестицион қизиқиш”ни кўрсатади.
