10 октябрь куни Пхенянда Корея Меҳнат партияси тузилганининг 80 йиллиги катта тантана билан нишонланди. Байрам парадида ўн минглаб аскарлар қатнашди, маросимни эса партия бош котиби — 41 ёшли Ким Чен Ин минбардан кузатди.
Бугун унинг ҳокимияти ҳеч қачон бўлмагандек мустаҳкам — отаси Ким Чен Ир вафот этганига 14 йил ўтган бўлса-да, мамлакатдаги сиёсий тизим тўлиқ унинг қўлида.
Мутахассисларнинг фикрича, Шимолий Корея халқаро саҳнада яна муҳим ўйинчига айланмоқда. Бунга Россиянинг Украинага бостириб кириши ҳамда АҚШ ва Хитой ўртасидаги кескин рақобат сабаб бўлган.
Эндиликда Пхенян Москва ва Пекин учун стратегик ҳамкор сифатида қаралмоқда. Россия КХДРга ёқилғи ва озиқ-овқат етказиб беради, эвазига эса шимолий кореялик ўқ-дорилар ва ҳарбийларни олади.
Собиқ дипломат ва қочқин Ли Ил Кю бу жараённи қуйидагича изоҳлади:
“Пхеняннинг Москвани қўллаб-қувватлаш қарори сиёсий жиҳатдан тўғри бўлган — бу Шимолий Кореянинг мақомини анча оширди”.
Хитой эса энди БМТ санкцияларини аввалгидек қатъий бажармаяпти. Шу боис, Пхенян ядро дастурини жадаллик билан давом эттирмоқда. АҚШ ҳарбий разведкасига кўра, 2025 йилнинг май ойида Шимолий Корея “сўнгги ўн йилликларда энг кучли стратегик позицияга” эга бўлган ва Шарқий Осиёдаги АҚШ ҳамда иттифоқчилари учун хавф манбаи сифатида баҳоланмоқда.
Ким Чен Иннинг узоқ муддатли стратегияси эса аниқ: ҳокимиятни оиласи қўлида сақлаб қолиш. Шу йўлда у ядро ва оддий қуролларни бир вақтда ривожлантириш сиёсатини йўлга қўйган. 2025 йил сентябрида бўлиб ўтган партия съездида у ядро ва анъанавий қуролланишни биргаликда ривожлантириш доктринаси эълон қилинишини маълум қилди.
