Судларда кўрилаётган фуқаролик ишлари салмоғи қанча? Қайси йўналишларда кўпроқ даъво аризалари келиб тушмоқда?
Олий суд ахборот хизмати раҳбари Азиз Обидов шу каби саволларга жавоб берди:
– 2025 йилнинг 9 ойида фуқаролик ишлари бўйича судлар томонидан 8,2 триллион сўмдан зиёд мажбурий тўловларни ундириш ҳақида 1 миллион 135 минг 823 суд буйруғи чиқарилди.
Улар асосан вояга етмаган болалар учун алимент, иш ҳақи ва унга тенглаштирилган тўловлар, ёзма битимга асосланган ва қарздор томонидан тан олинган талаблар, коммунал хизматлар бўйича қарздорлик тўловлари ва бошқаларни ташкил этди.
Шунингдек, 472 минг 932 фуқаролик иши кўриб чиқилиб, уларнинг 365 минг 164 таси бўйича талаблар қаноатлантирилган. 56 минг 804 таси бўйича талаблар қаноатлантиришдан рад қилинган. 45 минг 682 таси бўйича даъволар кўрмасдан қолдирилган бўлса, 5 минг 282 таси бўйича ишни юритиш тугатилган.
Кўриб тамомланган фуқаролик ишлардан 151 минг 519 таси битимлар, 52 минг 507 таси никоҳдан ажратиш, 19 минг 493 таси уй-жой муносабатлари, 14 минг 595 таси алоҳида тоифадаги ишлар, 9 минг 116 таси ўзбошимчалик билан қурилган уй-жой ёки қурилмани бузиш, 2 минг 835 таси оталикни белгилаш билан боғлиқ ва бошқа тоифадаги ишларни ташкил қилди.
Никоҳдан ажратишга оид кўрилган ишлар таҳлилига кўра, кўриб тамомланган ишларнинг 27 минг 578 таси бўйича даъво талаблари қаноатлантирилган (никоҳлар бекор қилинган), 18 минг 430 таси бўйича даъво талабларини қаноатлантириш рад этилган, 4 минг 658 таси кўрмасдан қолдирилган ҳамда 1 минг 841 та даъво бўйича ишни юритиш тугатилган.
2 минг 375 ишга тиклашга доир кўриб тамомланган ишларнинг мингдан зиёди бўйича даъво талаблари қаноатлантирилган. 911 таси бўйича даъво талабларини қаноатлантириш рад этилган, 361 таси кўрмасдан қолдирилган ҳамда 50 даъво бўйича ишни юритиш тугатилган.
Вилоят ва унга тенглаштирилган судларнинг фуқаролик ишлари бўйича судлов ҳайъатлари томонидан апелляция тартибида 9 минг 672 иш кўриб чиқилди.
Биринчи инстанция судлари томонидан чиқарилган 1 минг 720 қарор бекор қилиниб, 587 суд қарори ўзгартирилди. Кассация тартибида 6 минг 357 иш кўриб чиқилди.
Биринчи инстанция судлари томонидан чиқарилган 1 минг 243 қарор бекор қилиниб, 541 суд қарори ўзгартирилди. Тафтиш тартибида 4 минг 267 иш кўриб чиқилди.
Қуйи инстанция судлари томонидан чиқарилган 363 қарор бекор қилиниб, 106 суд қарори ўзгартирилди.
Олий суднинг Фуқаролик ишлари бўйича судлов ҳайъати томонидан тафтиш тартибида 257 иш кўриб чиқилди. Қуйи судлар томонидан чиқарилган 130 қарор бекор қилиниб, 35 суд қарори ўзгартирилди.
