Хитой АҚШни ўзининг Миллий вақт хизмати марказига киберҳужум уюштириб, марказ ходимлари устидан жосуслик мақсадида маълумотлар ўғирлаганликда айблади. Бу ҳақда мамлакат Давлат хавфсизлик вазирлиги WeChat’даги расмий саҳифасида хабар берди.
Расмий Пекиннинг баёнотига кўра, АҚШ Миллий хавфсизлик агентлиги (НСА) 2022 йилдан буён марказ тармоқларига ва ходимларнинг мобил қурилмаларига кириб, маълумот тўплаб келган. Хитой томони АҚШ разведкаси хорижий бренд смартфонларининг хабар алмашиш тизимидаги заифликдан фойдаланганини таъкидламоқда.
2023–2024 йилларда эса АҚШ марказнинг ички тармоқларига чуқур кириб борган ва юқори аниқликдаги вақтни ўлчаш тизимини издан чиқаришга уринган. Бу тизимлар алоқа, молия, транспорт ва мудофаа каби соҳаларда вақт синхронизациясини таъминлайди.
Ҳозирча Вашингтон бу айбловларга расман жавоб бермаган. Миллий вақт хизмати маркази Циан шаҳрида жойлашган бўлиб, бутун Хитой бўйлаб вақтни аниқ мувофиқлаштириш вазифасини бажаради.
