Ўзбекистонда 170 мингдан ортиқ ташкилотнинг 740 мингдан ошиқ ходимида мол-мулк ва ер солиғидан қарздорликлар мавжуд. Бу ҳақда Солиқ қўмитаси хабар берди.
Билдирилишича, 2025 йил 15 октябрь ҳолатига 173 391 та ташкилотнинг 747 940 ходимида 882 939 солиқ объекти бўйича 831,5 миллиард сўм тўланмаган солиқ қарздорлиги мавжуд.
Бунда 501,2 миллиард сўм ер солиғи бўлса, 330,3 миллиард сўм мол-мулк солиғидир.
Энг кўп қарздорлик 644,9 миллиард сўм солиқ қарзи билан тижорат ташкилотлари ва 150,8 миллиард сўм қарз билан бюджет ташкилотлари ходимлари ҳисобига тўғри келган. Шунингдек, нодавлат-нотижорат ташкилот ишчиларининг 35,8 миллиард сўм солиқ қарзи мавжуд.
Тижорат ташкилотларидан саноат соҳасидаги 20,8 мингта ташкилотда ишловчи 130,1 минг нафар ходимнинг 140,7 миллиард сўм, қишлоқ, ўрмон ва балиқ хўжалигида 50,9 мингта ташкилотда ишловчи 88,8 минг нафар ходимнинг 138,6 миллиард сўм, савдо соҳасидаги 41,3 мингта ташкилотда ишловчи 71,6 минг нафар ишчининг 116 миллиард сўм, қурилишларда 10,1 мингта ташкилотда ишловчи 58,6 минг нафар ишчининг 90,3 миллиард сўм солиқдан қарзи бор.
Бундан ташқари, ташиш ва сақлаш соҳасида 5,4 мингта ташкилотда 33,2 минг ходимда 30,6 миллиард сўм, соғлиқни сақлаш ва ижтимоий хизматларда 4,3 мингта ташкилотда 10,4 минг ходимнинг 11,7 миллиард сўм, ахборот ва алоқа соҳасида 2,2 мингта ташкилотнинг 9,6 минг ишчисида 8,7 миллиард сўм ҳамда бошқа фаолият турларида 16,8 мингта ташкилотда 65,4 минг нафар ходимнинг 79,8 миллиард сўм мол-мулк ва ер солиқлари бўйича қарздорлиги мавжуд.
Ишчилари энг кўп солиқ тўлаши лозим бўлган ТОП-3 ташкилотлар:
“Темирйўлларинфратузилма” АЖ — 4 миллиард сўм;
“Олмалиқ Конь-металлургия комбинати” АЖ — 3,3 миллиард сўм;
“Ҳудудий электр тармоқлари” АЖ — 3,3 миллиард сўм.
