Саида Мирзиёева Қозоғистон Президент Қосим-Жомарт Тўқаев билан учрашди. Томонлар икки давлат ўртасидаги ҳамкорликни кенгайтириш масалаларини муҳокама қилди.
Саида Мирзиёева Шавкат Мирзиёевнинг саломи ва эзгу тилакларини етказди ҳамда Ўзбекистон Қозоғистонни ишончли иттифоқчи сифатида кўришини таъкидлади.
Президенти администрацияси рахбари учрашув давомида икки мамлакат ўртасидаги стратегик шериклик ва иттифоқчилик муносабатларини янада ривожлантириш масалаларини муҳокама қилди. Шунингдек, Қозоғистон томонининг самимий қабул ва ўзбек-қозоқ дўстлиги ҳамда қардошлик ришталарини мустаҳкамлаш йўлидаги саъй-ҳаракатлари учун минатдорлик билдирди.
Тўқаев Мирзиёеванинг ташрифини Остона ва Тошкент ўртасидаги стратегик шерикликни илгари суришда муҳим аҳамиятга эга эканини таъкидлаб, президентлар администрацияларининг икки томонлама алоқаларни ривожлантиришдаги ўрнига алоҳида тўхталди.
У шунингдек, Қозоғистонда 2026 йил “рақамлаштириш ва сунъий интеллект йили” деб эълон қилинганини эслатиб, Ўзбекистоннинг бу борадаги тажрибасига қизиқиш билдирди.
Учрашувда савдо-иқтисодий ва маданий-гуманитар ҳамкорлик, шунингдек, икки мамлакатда амалга оширилаётган ислоҳотлар муҳокама қилинди.
