АҚШ Сенатида Россияга қарши кескин иқтисодий санкцияларни кўзда тутувчи қонун лойиҳаси кўриб чиқилиши президент Дональд Трамп ва Владимир Путин ўртасидаги учрашувгача кечиктирилди. Бу ҳақда республикачилар етакчиси Жон Тюн “Блоомберг” нашрига берган интервьюсида маълум қилди.
“Биз ҳозирча пауза тугмасини босдик”, — деди Тюн.
Санкциялар лойиҳаси сенаторлар Линдси Грем ва Ричард Блументал томонидан 2025 йилнинг апрелида таклиф қилинган. Ҳужжатда Россия Украина билан узоқ муддатли тинчликка рози бўлмаган тақдирда, унинг нефть, газ, уран ва бошқа хомашё экспортига 500 фоизлик бож жорий этилиши кўзда тутилган.
Гремнинг айтишича, ушбу “ҳалокатли” санкцияларни Сенатдаги 100 аъзонинг 80 нафари қўллаб-қувватлашга тайёр эди. Бироқ Сенатнинг ёзги танаффуси ва Трампнинг Украина борасидаги баёнотлари ортидан лойиҳанинг илгари сурилиши вақтинча тўхтатилди.
Эндиликда санкцияларни жорий этиш бўйича сўнгги қарор Трампнинг ўзига қолдирилган. Президент уларни фармон орқали ҳам кучга киритиши мумкин.
Кремль матбуот котиби Дмитрий Песков бунга жавобан, Россия аллақачон кўплаб санкциялар остида яшаётганини ва натижада “иммунитет” шаклланганини таъкидлади.
Трамп ва Путин Будапештда учрашиши кутилмоқда. Учрашувнинг асосий мавзуси — Украина можаросини тинч йўл билан ҳал этиш бўлади.