Давлат хавфсизлик хизмати ва Иқтисодий жиноятларга қарши курашиш департаменти томонидан ўтказилган тезкор тадбир давомида йирик миқдордаги қўшилган қиймат солиғи (ҚҚС) билан боғлиқ фирибгарлик ҳолати фош этилди.
Маълум бўлишича, илгари солиқ идораларида ишлаган, ҳозирда Тошкент шаҳридаги транспорт ва логистика хизматлари кўрсатадиган МЧЖда ҳисобчи лавозимида фаолият юритаётган шахс ўзининг собиқ ҳамкасблари орқали бўёқ маҳсулотлари ишлаб чиқарувчи корхонага 17 миллиард сўмлик ҚҚСнинг манфий фарқ суммасини қайтариш ҳамда тўхтатилган ҚҚС гувоҳномасини қайта фаоллаштириб бериш эвазига 35 минг АҚШ доллари талаб қилган.
Ушбу шахс МЧЖ таъсисчисидан 20,5 минг долларни олган вақтида ашёвий далиллар билан қўлга олинган.
Ҳолат юзасидан ҳисобчи ва бошқа шахсларга нисбатан Жиноят кодексининг 168-моддаси 4-қисми “а” банди ва 28,211-моддаси 3-қисми “а” банди бўйича жиноят иши қўзғатилди.
Дастлабки тергов давомида гумондор ўзининг “ёрдамини” Солиқ қўмитасининг катта инспектори орқали амалга оширмоқчи бўлганини тан олган. Мазкур давлат хизматчиси ҳам жиноий ишга гумонланувчи сифатида жалб этилган.
