Бугун, 28 октябрь куни Италияда “Интер” клуби дарвозабони Хосеп Мартинес иштирокида йўл-транспорт ҳодисаси содир бўлди. Мартинес Аппяно-Жентиле яқинидаги Фенегро шаҳрида 81 ёшли йўловчини автомобилда уриб юборган. Бу ҳақда “Анса” хабар берди.
Манбага кўра, йўл-транспорт ҳодисаси анча хавфли бўлган. Мартинес воқеадан сўнг дарҳол тўхтаб, биринчи ёрдам кўрсатишга уринган. Ҳодиса жойига вертолёт, тез ёрдам ва карабинерлар етиб борган, бироқ барча саъй-ҳаракатларга қарамай тиббиёт ходимлари кекса одамнинг ҳаётини сақлаб қола олмаган.
Дастлабки суриштирувлар жабрланувчи ногиронлар аравачасида ҳаракатланаётиб, кутилмаганда йўналишини ўзгартириб, Мартинес бошқарувидаги автомобиль йўлига чиқиб қолганини кўрсатмоқда. Фожиа 28 октябрь куни маҳаллий вақт билан соат 9:30 атрофида содир бўлган.
Воқеа сабабли “Интер” клуби бош мураббийи Кристиан Киву “Фиорентина”га қарши ўйинга бағишланган матбуот анжуманини бекор қилган. Клуб расмий баёнотида воқеадан чуқур афсусда эканини билдириб, марҳумнинг яқинларига ҳамдардлик изҳор этган.
