Financial Times’нинг ёзишича, Москва АҚШга Украинага нисбатан ўзининг “қаттиқ позициясини” тасдиқловчи меморандум юборгач, Вашингтон президентлар Дональд Трамп ва Владимир Путиннинг Будапештда ўтказилиши режалаштирилган учрашувини бекор қилган.
Россия ҳужжатда Украинадан ҳудудий имтиёзлар, қуролли кучларни қисқартириш ва НАТОга қўшилмаслик кафолатини талаб қилган. Шунингдек, Москва Донбасс устидан тўлиқ назоратни ўрнатиш ниятини яна бир бор билдирган.
Мазкур ҳолатдан сўнг АҚШ Давлат котиби Марко Рубио ва Россия Ташқи ишлар вазири Сергей Лавров ўртасида кескин телефон мулоқоти бўлиб ўтган. Рубионинг сўзларига кўра, Россия музокараларга тайёр эмаслиги аниқ бўлган.
Дональд Трамп 22 октябрь куни учрашувни бекор қилганини тасдиқлаб, шундай деган: “Бу пайтда буни ўтказиш тўғри эмас деб ўйладим. Керакли натижага эришмаслигимизни билдим. Аммо келажакда бу учрашув амалга ошади.”
Путин эса учрашувнинг “бекор қилинганидан кўра, кечиктирилганини” айтиб, мулоқот урушдан ҳар доим афзал эканини таъкидлади.
